الیکشن کمیشن جموںکشمیر میں فوری انتخابات کے انعقاد کیلئے پر عزم

جموں/۹؍اگست
چیف الیکشن کمشنر آف انڈیا راجیو کمار نے جمعہ کے روز کہا کہ جموں وکشمیر میں اسمبلی انتخابات کے انعقاد کی تاریخ کا اعلان دہلی میں حتمی سیکورٹی جائزہ میٹنگ کے بعد ہی کیا جائے گا۔
تاہم انہوں نے کہا کہ الیکشن کمیشن جموںکشمیر میں فوری انتخابات کے انعقاد کیلئے پر عزم ہے اور انتخابات کو متاثر کرنے والی چھوٹی کوششیں اس عمل کو درہم و برہم نہیں کر سکتی ہیں۔
ان باتوں کا اظہارکمار نے جموں میں ایک پریس کانفرنس کے دوران کیا۔
چیف الیکشن کمشنر نے کہاکہ جموں خطے میں چند دہشت گردانہ حملوں کے تناظر میں ہماری افواج صورتحال سے نمٹنے کی صلاحیت رکھتی ہیں۔ان کے مطابق ہم جموں وکشمیر میں کسی کو بھی انتخابی عمل میں رخنہ ڈالنے کی اجازت نہیں دیں گے ۔
کمارنے کہا’’جہاں تک جموںکشمیر میں انتخابات کی تاریخوں کا تعلق ہے ہم دہلی میں حتمی سیکورٹی جائزہ میٹنگ کے بعد انتخابات کی تاریخوں کا اعلان کریں گے ‘‘۔
چیف الیکشن کمشنرنے کہاکہ جموں کشمیر کی سبھی سیاسی پارٹیوں نے یک زبان ہو کر الیکشن کرانے کا مطالبہ کیا ہے ۔ان کا مزید کہنا تھا کہ جموں وکشمیر میں پولیس اور دیگر سیکورٹی ایجنسیوں کے ساتھ ساتھ سیول انتظامیہ سے وابستہ آفیسران نے میٹنگ کے دوران کہاکہ گر چہ سیکورٹی چیلنجز ہیں لیکن وہ جموں وکشمیر میں پر امن انتخابات کے لئے پوری طرح سے تیار ہیں۔
کمار نے کہاکہ حالیہ لوک سبھا انتخابات میں جموں وکشمیر کے لوگوں نے انتخابی عمل میں بڑھ چڑھ کر حصہ لے کر نئی تاریخ رقم کی ہے ۔
چیف الیکشن کمشنرنے مزید بتایا کہ حد بندی کا عمل مکمل ہونے کے بعد دسمبر کے مہینے میں پارلیمنٹ میں جموں وکشمیر تنظیم نو ایکٹ پاس کیا گیا جس کے بعد چناؤ کمیشن نے الیکشن کے حوالے سے تیاریاں شروع کی۔
کمار نے کہا ’’جموں وکشمیر میں پر امن، شفاف اور آزادانہ انتخابات کے حوالے سے زمینی سطح پر اقدامات کئے جارہے ہیں‘‘۔ انہوں نے مزید بتایا کہ سرینگر اور جموں میں سیاسی پارٹیوں کے وفود نے لوک سبھا کے پر امن انتخابات پر ای سی آئی کی ستائش کی ۔
انتخابی کمیشن کے سربراہ کا کہنا تھا کہ سیاسی پارٹیوں نے کچھ مطالبات بھی سامنے رکھیں جن میں پولنگ بوتھ کے قیام کو دو کلومیٹر کے دائرے میں رکھنے کے ساتھ ساتھ سبھی پولنگ مراکز میں سی سی سی ٹی وی نصب کرنے کا مطالبہ کیا ہے ۔
کمارکے مطابق سیاسی پارٹیوں کے ان دو مطالبات کو پورا کیا گیا اور اس حوالے سے ہدایات بھی جاری کی گئی ہیں۔
جموں وکشمیر میں اسمبلی انتخابات کے حوالے سے سپریم کورٹ کی ڈیڈ لائن کے بارے میں پوچھے گئے سوال کے جواب میں چیف الیکشن کمیشن آف انڈیا نے کہا’’کوئی بھی اندرونی یا بیرونی طاقت جموں وکشمیر میں انتخابات میں تاخیر نہیں کرسکتی اور یہ کہ خلل ڈالنے والی قوتوں کو منہ توڑ جواب دیا جائے گا۔‘‘