یو پی ایس سی ۲۰۲۳ کے نتائج کا اعلان‘ملک بھر سے۵۰ مسلم امیدوار کامیاب

نئی دہلی//
یو پی ایس سی سیول سرویسس۲۰۲۳ کے نتائج میں جملہ ۵۰ مسلم امیدواروں نے کامیابی حاصل کی ہے۔ اس طرح جملہ کامیاب امیدواروں میں مسلم امیدواروں کی کامیابی کا تناسب تقریباً ۵ فیصد رہا ہے۔
گذشتہ سال ۲۰۲۲ کے مقابلہ اس مرتبہ مسلم امیدواروں کا مظاہرہ خاصہ بہتر رہا ہے جبکہ اْس سال صرف ۳۳ مسلم امیدوار اس اعلیٰ امتحان میں کامیاب ہوسکے تھے۔
اس مرتبہ ایک مسلم لڑکی نوشین کو نواں رینک حاصل ہوا ہے، اس طرح ٹاپ۱۰ میں صرف ایک مسلم امیدوار شامل ہے۔
یو پی ایس سی سیول سرویسس کی میرٹ لسٹ ۲۰۲۳جاری کردی گئی ہے۔ ان میں ۵مسلم امیدواروں نے ٹاپ ۱۰۰ کی فہرست میں مختلف رینک اور پوزیشن حاصل کئے ہیں۔
آئی اے ایس، آئی پی ایس، آئی ایف ایس، آئی آر ایس اور دیگر سیول سرویسس کے عہدوں کیلئے جملہ ۱۰۱۶؍ امیدواروں کو کامیاب قرار دیتے ہوئے ان کے تقرر کی سفارش کی گئی ہے۔
جملہ۱۰۱۶؍ امیدواروں میں سے مجموعی طور پر۳۴۷ جنرل زمرہ سے‘۱۱۵ معاشی کمزور طبقات سے‘۳۰۳؍او بی سی سے‘۱۶۵ درج فہرست ذاتوں سے اور ۸۶ درج فہرست قبائل کے زمرے سے منتخب ہوئے ہیں۔ کامیاب امیدواروں میں۵۰ مسلمان ہیں‘جن میں ۱۶لڑکیاں شامل ہیں۔
مجموی نتائج میں آدتیہ سریواستو نے پہلا رینک حاصل کیا ہے، انیمیشن پردھان نے دوسرا رینک حاصل کیا ہے، ڈی اننیا ریڈی نے تیسرا، سدھارتھ رام کمار نے چوتھا جبکہ روحانی نامی لڑکی نے پانچواں رینک حاصل کیا ہے۔
سول سرویسس ۲۰۲۲کی ٹاپ۱۰۰ فہرست میں ۵مسلمانوں نے جگہ بنائی ہے۔ نوشین نامی لڑکی ٹاپ ۱۰کی فہرست میں شامل ہے۔ انہوں نے ۹واں رینک حاصل کیا۔
واضح رہے کہ گذشتہ سال یو پی ایس سی امتحان میں۳۳ مسلم امیدوار کامیاب ہوئے تھے جبکہ اس سے پہلے ۲۰۲۱ میں صرف۲۱ مسلم امیدواروں نے کامیابی حاصل کی تھی۔۲۰۲۰ میں۳۱ مسلمان منتخب ہوئے تھے۔
اس دوران جموں کی انمول راٹھور نے یو پی ایس سی فائنل امتحان میں ساتواں رینک حاصل کیا ہے۔ وہ ادرانا گاؤں بھدرواہ کی رہنے والی ہیں اور گجرات نیشنل لاء یونیورسٹی، گاندھی نگر سے قانون میں گریجویٹ ہیں۔