بانڈی پورہ گریز شاہراہ پر برف ہٹانے کا کام جاری

بانڈی پورہ//
۸۵کلومیٹر طویل بانڈی پورہ،گریز سڑک جو رازدان پاس پر بھاری برف جمع ہونے کی وجہ سے ۱۰ دنوں سے ٹریفک کے لیے بند ہے، آنے والے دنوں میں کھلنے کا امکان ہے۔
یاد رہے کہ امسال بانڈی پورہ،گریز سڑک بھاری برفباری کے سبب صرف ۳۸ دنوں تک بند رہی اور یہ شاہراہ ۲۷ مارچ کو ٹریفک کے لیے کھول دی گئی تھی، تاہم ۲۹مارچ سے رازادان پاس پر بھاری برفباری کے بعد مذکوہ شاہراہ کو ٹریفک کے لیے بند کر دیا گیا۔
سرکاری ذرائع نے بتایا کہ بارڈر روڈز آرگنائزیشن (بی آر او) جو سڑک پر برف ہٹانے کا آپریشن کر رہی ہے، تمام تر مشکلات سے لڑنے کے باوجود کم سے کم وقت میں اپنا آپریشن مکمل کرنے میں کامیاب رہی ہے۔
ان کا کہنا تھا کہ ممکنہ طور پر آنے والے دنوں میں سڑک پر ٹریفک کی نقل و حرکت کھل جائے گی، جو کہ آگے کے علاقے میں تعینات فوجیوں کے ساتھ ساتھ علاقے کی مقامی آبادی کے لیے بھی ایک بڑی راحت ہوگی۔
دریں اثنا، حکام نے بتایا کہ گریز-بانڈی پورہ کے ساتھ برف صاف کرنے کا کام زور و شور سے جاری ہے اور اس سڑک کو جلد از جلد کھولنے کو یقینی بنایا جا رہا ہے۔
قابل ذکر بات یہ وادی گریز کو ملک کے باقی حصوں سے جوڑنے والی سڑک اس دور افتادہ خطے میں رہنے والے لوگوں کے لیے لائف لائن ہونے کے ساتھ ساتھ ایل او سی پر تعینات فوجیوں کے لیے کافی اہمیت کے حامل شاہراہ ہے۔ اسی شاہراہ سے وادی گریز کے لیے ضروری ساز و سامان پہنچایا جاتا ہے۔