جموں//
جموں لوک سبھا حلقہ میں رائے دہندگان کیلئے بغیر کسی خوف یا دھمکی کے اپنے حق رائے دہی کا استعمال کرنے کیلئے سازگار اور محفوظ ماحول کو یقینی بنانے کے لئے سیکورٹی جائزہ اجلاس میں پیر کو ایک سیکورٹی جائزہ اجلاس میں حکمت عملی پر تبادلہ خیال کیا گیا۔
جموں پارلیمانی سیٹ پر دوسرے مرحلے میں ۲۶؍ اپریل کو ووٹ ڈالے جائیں گے۔
ترجمان نے بتایا کہ سینئر سپرنٹنڈنٹ آف پولیس (جموں) ونود کمار کی صدارت میں ضلع پولیس لائنز میں ہونے والے اجلاس میں پولنگ اسٹیشنوں، انتخابی عہدیداروں اور رائے دہندگان کی حفاظت کے لئے سیکورٹی اہلکاروں کی تعیناتی اور کوآرڈینیشن، انتخابی دورانیے کے دوران کسی بھی ناخوشگوار واقعہ یا خلل کو روکنے کے لئے سخت حفاظتی پروٹوکول پر عمل درآمد پر تفصیلی تبادلہ خیال کیا گیا۔
ترجمان نے کہا کہ کسی بھی ابھرتے ہوئے سیکیورٹی چیلنجز یا خطرات سے نمٹنے کے لئے متعلقہ حکام اور اسٹیک ہولڈرز کے ساتھ تعاون، امن و امان کو برقرار رکھنے، انتخابی دھاندلی یا غیر قانونی سرگرمیوں کی کسی بھی کوشش کے خلاف چوکس رہنے کے بارے میں بھی اجلاس میں تبادلہ خیال کیا گیا جو انتخابی عمل کی سالمیت کو متاثر کرسکتے ہیں۔
ترجمان نے بتایا کہ پولیسنگ کے مختلف پہلوؤں بشمول مقدمات کی معیاری تفتیش، جرائم کو نمٹانے، تصدیق، نارکوٹکس ڈرگس اینڈ سائکوٹروپک سبسٹینس (این ڈی پی ایس) اور غیر قانونی سرگرمیوں (روک تھام) ایکٹ کے مقدمات کو نمٹانے، تفتیش کی کارروائی، مفرور اور لاپتہ افراد اور جوابدہ پولیسنگ سے متعلق دیگر امور پر بھی تبادلہ خیال کیا گیا۔
ایس ایس پی نے افسران کو ہدایت کی کہ وہ زیر تفتیش مقدمات کو مقداری اور معیاری طریقے سے نمٹانے کو یقینی بنائیں۔انہوںنے اس بات پر زور دیا کہ عوام کے مسائل سے نمٹنے کے لئے ردعمل میں تیزی کے ساتھ ساتھ شائستہ رویہ اور دل سے ہمدردی کی بھی ضرورت ہوتی ہے۔