بانڈی پورہ سڑک حادثے میں کمسن جاں بحق

سرینگر//
شمالی ضلع بانڈی پورہ میں گاڑی نے کمسن بچی کو زور دار ٹکر ماری جس وجہ سے اس کی برسر موقع ہی موت واقع ہوئی۔
اطلاعات کے مطابق بانڈی پورہ ضلع کے پاریبل حاجن گاوں میں منگل کے روز ٹاٹا سومو نے کمسن بچی کو ٹکر مار کر شدید طورپر زخمی کیا۔
معلوم ہوا ہے کہ آس پاس موجود لوگوں نے کمسن بچی کو علاج ومعالجہ کی خاطر نزدیکی ہسپتال منتقل کیا تاہم وہ وہاں پر جانبر نہ ہو سکی۔
متوفی کی شناخت عفرت دختر منظور احمد خان ساکن پاریبل کے بطور ہوئی ہے ۔
دریں اثنا پولیس نے سومو ڈرائیور کو حراست میں لے کر تحقیقات شروع کی ۔
اس دوران بارہمولہ کے پٹن علاقے میں پیر کو پیش آئے ایک سڑک حادثے میں ایک معمر شہری کی موت ہو گئی، جب کہ دوسرا زخمی ہو گیا ہے۔
مقامی ذرائع نے بتایا کہ پٹن کے زنگام علاقے میں سکوٹی اور موٹرسائیکل کے درمیان ٹکر ہوئی جس کے نتیجے میں دونوں سوار زخمی ہوگئے۔ انہوں نے بتایا کہ دونوں زخمیوںکو فوری طور پر قریبی ہسپتال لے جایا گیا، جہاں سے اْنہیں ایس ایم ایچ ایس سرینگر منتقل کیا گیا، جہاں زخمیوں میں سے ایک شخص دم توڑ گیا۔متوفی کی شناخت ۷۰سالہ عبدالسلام تانترے ساکن پلہالن پٹن کے طور پر ہوئی ہے جبکہ زخمی کی شناخت ۳۴سالہ ارشاد احمد گنائی کے طور پر ہوئی ہے جس کی حالت مستحکم بتائی جا رہی ہے۔
ادھرسرینگر ضلع کے کھونموہ علاقے میں پیر کی دیر رات مٹی کے تودے کی زد میں آنے سے ایک جے سی بی ڈرائیور کی موت واقع ہو گئی ہے۔ متوفی آپریٹر کی شناخت مشتاق احمد کے طور سے ہوئی ہے۔
سرینگر کے سونہ وار باغ کے قریب پیر کی دیر شام ایک سڑک حادثے میں ایک آٹو رکشہ ڈرائیور کی موت واقع ہو گئی۔ذرائع نے بتایا کہ ایک آٹو رکشہ ڈرائیور پیر کی شام سونہ وار باغ کے قریب نامعلوم گاڑی کی ٹکر سے شدید طور پر زخمی ہوگیا۔ان کا کہنا تھا کہ اسے علاج کے لیے ایس ایم ایچ ایس ہسپتال لے جایا گیا، جہاں پہنچنے پر ڈاکٹروں نے اسے مردہ قرار دے دیا۔متوفی کی شناخت محمد اشرف شیخ سکنہ پامپور کے طور پر ہوئی۔