کشمیر میں۲۷سے۳۱مارچ تک موسم نا موافق رہنے کا امکان:احمد

سرینگر//
محکمہ موسمیات نے وادی کشمیر میں ۲۷سے۳۱ مارچ تک موسم نا موافق رہنے کی پیش گوئی کرتے ہوئے کسانوں سے اس دوران باغوں یا کھیت کھلیانوں سے متعلق اپنے آپریشنز معطل رکھنے کا مشورہ دیا ہے ۔
محکمہ موسمیات سرینگر کے ڈائریکٹر ‘مختار احمد نے کہا کہ۲۷مارچ سے دو مغربی ہوائوں کی لہریں یکے بعد دیگرے وارد وادی ہو رہی ہیں جس کے نتیجے میں۲۷؍اور۲۸مارچ کو کچھ پہاڑی علاقوں میں ہلکی برف باری جبکہ کچھ میدانی علاقوں میں ہلکی بارشیں ہوسکتی ہیں۔
احمد نے کہا کہ بعد ازاں۲۸مارچ کی سہہ پہر سے۲۹مارچ کی شام تک موسم مجموعی طور پر خشک رہ سکتا ہے ۔
محکمہ موسمیات سرینگر کے ڈائریکٹر کا کہنا تھا کہ بعد ازاں دوسری مغربی ہوا کی لہر کے داخل ہونے کے باعث۲۹مارچ کی شام سے۳۱مارچ کی دوپہر تک پہاڑی علاقوں میں کہیں کہیں ہلکی برف باری جبکہ میدانی علاقوں میں ہلکی سے درمیانی درجے کی بارشوں کا امکان ہے ۔
احمدنے کہا کہ اس دوران کہیں کہیں گرج چمک کے ساتھ تیز ہوائیں بھی چل سکتی ہیں۔انہوں نے کہا کہ بعد میں وادی میں۳۱مارچ کی سہہ پہر سے۵؍اپریل تک موسم خشک رہنے کا امکان ہے ۔
محکمہ موسمیات سرینگر کے ڈائریکٹر نے کسانوں سے کہا کہ وہ اس دوران باغوں اور کھیتوں سے متعلق آپریشنز معطل رکھیں اور یکم اپریل سے باغوں کی دوا پاشی و دیگر کام شروع کریں۔
دریں اثنا وادی کے شبانہ درجہ حرارت میں کہیں گراوٹ تو کہیں اضافہ درج ہوا۔
سرینگر میں کم سے کم درجہ حرارت۴ء۵ڈگری سینٹی گریڈ ریکارڈ کیا گیا جہاں گذشتہ شب کا درجہ حرارت۰ء۷ڈگری سینٹی گریڈ ریکارڈ ہوا تھا۔
ایک اورسیاحتی مقام گلمرگ میں کم سے کم درجہ حرارت۸ء۲ڈگری سینٹی گریڈ ریکارڈ کیا گیا جہاں گذشتہ شب کا درجہ حرارت۲ء۱ڈگری سینٹی گریڈ ریکارڈ ہوا تھا۔
ایک اور سیاحتی مقام پہلگام میں کم سے کم درجہ حرارت۷ء۰ڈگری سینٹی گریڈ ریکارڈ کیا گیا جہاں گذشتہ شب کا درجہ حرارت ۵ء۰ڈگری سینٹی گریڈ ریکارڈ ہوا تھا۔
شمالی ضلع کپوارہ میں کم سے کم درجہ حرارت۳ء۳ ڈگری سینٹی گریڈ ریکارڈ کیا گیا جہاں گذشتہ شب کا درجہ حرارت۹ء۳ڈگری سینٹی گریڈ ریکارڈ ہوا تھا۔
قصبہ قاضی گنڈ میں کم سے کم درجہ حرارت۴ء۴ڈگری سینٹی گریڈ ریکارڈ کیا گیا جہاں گذشتہ شب کا درجہ حرارت۲ء۴ڈگری سینٹی گریڈ ریکارڈ ہوا تھا۔