پلوامہ: زبردستی لوگوں سے رقومات اینٹھنے والا بھتہ خور گرفتار:پولیس

سرینگر//
جنوبی ضلع پلوامہ میں لوگوں سے زبردستی پیسے بٹورنے والے بھتہ خور کو پولیس نے دھر دبوچ کر اس کے قبضے سے دو نقلی پستول برآمد کرکے ضبط کئے ۔
پولیس کے ایک ترجمان نے بتایا کہ پولیس تھانہ راج پورہ کو معتبر ذرائع سے اطلاع موصول ہوئی کہ کچھ لوگ دھمکیاں دے کر عام لوگوں سے پیسے وصول کر رہے ہیں۔
ترجمان نے بتایا کہ پولیس نے معاملے کے متعلق ایف آئی آر زیر نمبر۲۲کے تحت کیس درج کرکے تحقیقات شروع کی ۔
ترجمان کے مطابق دوران تفتیش پولیس نے عندلیب احمد میر ولد عبدالرشید میر ساکن راجپورہ پلوامہ کو دھر دبوچ کر اس کے قبضے سے جرم میں استعمال ہونے والے دو کھلونا نما پستول برآمد کئے ۔
پولیس نے عوام الناس سے اپیل کی ہے کہ وہ ایسے شر پسند عناصر جو بھتہ خوری اور خوف و ہراس کا ماحول پیدا کرنے کی کوشش کر رہے ہیں کی نشاندہی کرنے میں اپنا دست تعاون فراہم کریں تاکہ ایسے جرائم پیشہ افراد کا قلع قمع کیا جاسکے ۔