نئی دہلی؍۳۱؍اکتوبر
جموں و کشمیر کے وزیر اعلیٰ عمر عبداللہ نے یہاں ٹیلی ویژن صحافی نِدھی رازدان کے ساتھ شادی کرلی ہے۔
۵۶ سالہ عمر عبداللہ نے ہفتہ کے روز سماجی رابطے کی ویب سائٹ ایکس پر اپنے پیغام میں لکھا، ’’کل ایک نئے سفر کا آغاز ہوا۔۔۔‘‘ اور اس پیغام میں نِدھی رازدان کو بھی ٹیگ کیا۔ ان کی اس پوسٹ کے ساتھ جوڑے کی چار تصاویر بھی شیئر کی گئیں۔
ذرائع کے مطابق دونوں کی شادی جمعہ کے روز نئی دہلی میں خصوصی شادی قانون (اسپیشل میرج ایکٹ) کے تحت انجام پائی۔ اس موقع پر دونوں خاندانوں کے افراد نے بطور گواہ شرکت کی۔
عمر عبداللہ کی پہلی اہلیہ پائل کے ساتھ شادی کو رواں سال جولائی میں سپریم کورٹ کے حکم کے بعد ختم کردیا گیا تھا۔ دونوں کے درمیان باہمی سمجھوتہ طے پانے کے بعد عدالت نے یہ حکم صادر کیا تھا۔
۴۹ سالہ نِدھی رازدان کی یہ دوسری شادی ہے۔سری نگر اور نئی دہلی میں منعقدہ شادی کی تقریبات میں دونوں خاندانوں کے افراد اور قریبی رشتہ داروں نے شرکت کی۔
تقریبات میں عمر عبداللہ کے والد فاروق عبداللہ، والدہ مولی، ان کی تین بہنوں اور دیگر قریبی رشتہ داروں کے علاوہ نِدھی رازدان کے والدین، معروف صحافی ایم کے رازدان اور سرلا رازدان بھی موجود تھے۔
۔۔۔۔۔۔(ایجنسیاں )
