جموں//
جموںکشمیر کے ضلع پونچھ میں منگل کی صبح سڑک کے دو الگ الگ حادثات میں ایک پولیس اہلکار سمیت تین افراد کی موت جبکہ تیسرا زخمی ہوا۔
ذرائع نے بتایا کہ پونچھ میں پلیرا کے نزدیک ایک آلٹو گاڑی سڑک سے لڑھک کر قریب ایک سو فٹ گہری کھائی میں جا گری جس کے نتیجے میں آلٹو ڈرائیور کی بر سر موقع ہی موت واقع ہوئی جبکہ دو دیگر زخمی ہوگئے۔
ذرائع نے بتایا کہ زخمیوں کو علاج و معالجے کیلئے فوری طور سب ضلع ہسپتال منڈی پہنچایا گیا جہاں ان میں سے ایک زخموں کی تاب نہ لا کر دم توڑ گیا۔
متوفین کی شناخت محمد صادق، جو ایک پولیس کانسٹیبل تھا، اور جمال احمد ساکنان پلیرا جبکہ زخمی کی شناخت نعیم الصادق کے بطور کی گئی ہے۔
دریں اثنا پولیس نے اس ضمن میں ایک کیس درج کرکے تحقیقات شروع کی ہیں۔
ادھر پونچھ کے کاجی موڑا علاقے میں ایک سڑک حادثے میں ایک ایس پی او کی موت واقع ہوئی۔انہوں نے بتایا کہ متوفی کی موٹر سائیکل سڑک کے نیچے جھاڑیوں میں پائی گئی اور اس کے نزدیک ہی اس کی لاش بھی پائی گئی۔ان کا کہنا تھا کہ موٹر سائیکل کو کسی گاڑی نے ٹکر مار دی ہے یا خود ہی قابو سے باہر ہوکر سڑک سے نیچے گری ہے اس کی جانچ کی جا رہی ہے۔
متوفی کی شناخت محمد خالق ولد محمد کریم ساکن منکوٹ کے بطور ہوئی ہے۔
دریں اثنا اطلاع موصول ہوتے ہی پولیس کی ایک ٹیم جائے موقع پر پہنچ گئی ہے اور لاش کو طبی و قانونی لوازمات کی ادائیگی کیلئے اپنی تحویل میں لے لیا ہے۔پولیس نے اس ضمن میں ایک کیس درج کرکے تحقیقات شروع کی ہیں۔