قومی سلامتی کے معاملے پرتمام سیاسی جماعتیں متحد ہیں:راج ناتھ

جموں//
بارڈر روڈ آگنائزیشن (بی آر او) کے۹۰؍انفراسٹرکچر پروجیکٹوں جو۲۹سو کروڑ روپیوں کی لاگت سے تیار ہوئے ہیں، کو قوم کے نام کرنے کے بعد مرکزی وزیر دفاع راج ناتھ سنگھ کا کہنا ہے کہ بی آر او کو چاہئے کہ وہ لوگوں کے دلوں کو اپنے کارناموں کے ساتھ جوڑیں۔
سنگھ نے کہا’’آپ (بی آر او) کا کام صرف ایک جگہ کو دوسری جگہ کے ساتھ جوڑنا نہیں ہے بلکہ لوگوں کے دلوں کو اپنے کاموں کے ساتھ جوڑنا بھی آپ کی ذمہ داری ہے ‘‘۔
وزیر دفاع نے ان باتوں کا اظہار ضلع سانبہ میں بشنوہ ‘ کول پور ‘ پھل پور روڈ پر دیوک برج کا افتتاح کرنے کے بعد اپنے خطاب کے دوران کیا۔
سنگھ نے کہا’’آپ کا کام صرف ایک جگہ کو دوسری جگہ کے ساتھ جوڑنا نہیں ہے بلکہ لوگوں کے دلوں کو اپنے کاموں کے ساتھ جوڑنا بھی آپ کی ذمہ داری ہے‘‘۔
ان کا کہنا تھا کا تعمیرات کا یہ کام ’لوگوں کا‘،’لوگوں کیلئے‘اور’لوگوں سے‘کے جذبے کو اجاگر کرنا چاہئے ۔ان۹۰پروجیکٹوں میں سے۳۶؍ارناچل پردیش میں‘۲۶لداخ میں‘ ۱۱جموں و کشمیر میں‘۵میزورم میں‘۳ ہماچل پردیش میں‘ سکم، مغربی بنگال اور اترا کھنڈ میں دو دو، ناگا لینڈ، راجستھان اور انڈومان نیکو بار جزیروں میں ایک ایک ہے ۔بی آر او نے ان اہم پروجیکٹوں کی تعمیر کا کام ریکارڈ وقت میں مکمل کیا ہے ۔
سنگھ نے بی آر او کو مسلح افواج کا بھائی قرار دیتے ہوئے کہا کہ بی آر او نہ صرف ملک کے سرحدوں کی حفاظت کر رہا ہے بلکہ ملک کے دور افتادہ علاقوں کی سماجی و معاشی ترقی کو یقینی بنانے میں بھی بڑا رول ادا کر رہا ہے ۔
وزیر دفاع نے کہا’’ہم بی آر او کے ساتھ مل کر اس بات کو یقینی بنا رہے ہیں کہ ملک محفوظ رہے اور سرحدی علاقے ترقی کے منازل طے کریں دور افتادہ علاقوں میں انفراسٹکچر پروجیکٹوں کی بر وقت تکمیل نئے انڈیا کا نیا نارمل بن گیا ہے ‘‘۔
۹ء۴۲۲میٹر طویل۷۰آر سی سی دیوک برج انتہائی اہمیت کا حامل ہے کیونکہ اس سے مسلح افواج کی آپریشنل تیاریاں مزید مستحکم ہوں گی اور علاقے میں سماجی و معاشی ترقی یقینی بن جائے گی۔
سنگھ نے امید ظاہر کی کہ بی آر او شن کن لا ٹنل جو۱۵ہزار۸سو۵۵فٹ اونچی ہے ،کو ریکارڈ وقت میں تعمیر کرکے ایک اور ریکارڈ قائم کرے گا۔انہوں نے کہا کہ یہ ٹنل ہماچل پردیش کے لاہول سپتی کو لداخ کے زنسکار سے جوڑے گی اور یہ ایک ہمہ موسمی ٹنل ہے ۔ان کا کہنا تھا کہ بی آر او سرحدی علاقوں میں انفراسٹرکچر کو وسعت دے کر ملک کی سلامتی کیلئے قابل قدر کام کر رہا ہے ۔
وزیر دفاع نے زور دے کر کہا کہ سرحدی علاقوں میں انفراسٹرکچر کی ترقی نہ صرف ملک کی سلامتی کیلئے موثر ہے بلکہ اس سے ہمسایہ ملک جس کے بھارت کے ساتھ دوستانہ مراسم ہیں، کے ساتھ کنکٹوٹی کو بھی فروغ ملتا ہے ۔
سنگھ نے کہا کہ بی آر او نے کئی دوسرے ممالک جیسے مینمار اور بھوٹان میں بھی انفراسٹرکچر پروجیکٹس تعمیر کئے ہیں اور ان ممالک کے ساتھ تعاون کو مستحکم کرنے میں مدد کی ہے ۔ان کا کہنا تھا کہ سول ‘ ملٹری ملاپ وقت کی اہم ضرورت ہے کیونکہ ملک کے تحفظ کی ذمہ داری صرف فوج پر نہیں ہے بلکہ عام لوگوں پر بھی ہے ۔انہوں نے کہا کہ بی آر او انفرسٹرکچر کو سول اور ملٹری سیکٹروں کے ساتھ تعاون کرکے تیار کر رہا ہے ۔
وزیر دفاع نے کہا کہ فوج اور عوام کا یہ باہمی تعاون سرحدی انفراسٹرکچر کے شعبے میں کئی سنہرے باب رقم کرے گا۔ملک کے سرحدوں کا تحفظ متحد ہو کر یقینی بنانے پر زور دیتے ہوئے انہوں نے کہا’’نظریاتی اختلافات کے باوجود قومی مفادات کے تحفظ کیلئے ریاستی حکومتوں کا تعاون قابل داد ہے‘‘۔انہوں نے بی آر او کی ماحولیات کے تحفظ کے تئیں ذمہ داری کا مظاہرہ کرکے نئی ٹیکنالوجی کے استعمال کرنے کی بھی سراہنا کی۔
سنگھ نے بی آر او سے تاکید کہ کہ وہ ماحولیات کے تحفظ کو یقینی بنانے کے ساتھ ساتھ اپنی ترقیاتی سرگرمیوں کو بھی جاری و ساری رکھیں۔
وزیر دفاع کا کہنا تھا’’اب تک ہم نے کم سے کم سرمایہ کاری، زیادہ سے زیادہ قیمت(ویلیو) کے منترا پر کام کیا ہے اب ہمیں آگے بڑھنا ہے اور کم سے کم موحولیاتی تباہی، زیادہ سے زیادہ قومی سلامتی اور بہبودی کے منترا پر کام کرنا ہے ‘‘۔