’پونچھ تصادم:جاں بحق ملی ٹینٹ بڑی واردات کو انجام دینے کی تاک میں تھے ‘

جموں///
فوج کا کہنا ہے کہ جموںکشمیر کے سرنکوٹ پونچھ میں سیکورٹی فورسز کے ساتھ تصادم میں مارے گئے ملی ٹینٹوں کے قبضے سے بڑی مقدار میں اسلحہ وگولہ بارود اور قابل اعتراض مواد برآمد کیا گیا ہے ۔انہوں نے کہاکہ مارے گئے ملی ٹینٹ غیر ملکی ہیں اوروہ بڑی واردات انجام دینے کی تاک میں تھے ۔
کمانڈر،۶سیکٹر راشٹریہ رائفلز‘ بریگیڈیئر ‘ایم پی سنگھ نے پونچھ میں صحافیوں کو بتایاکہ مقامی لوگوں کے تعاو ن سے ہی چار جنگجوؤں کو مار گرایا گیا جو یہ ثابت کرتا ہے کہ جموں وکشمیر کے لوگ محب وطن ہیں اور وہ امن و امان کے خواہاں ہیں۔
فوجی کمانڈر نے بتایا کہ ۱۶جولائی کو اطلاع موصول ہوئی کہ سرنکوٹ کے سندرا علاقے میں جدید ہتھیاروں سے لیس ملی ٹینٹوں کو دیکھا گیا ۔انہوں نے کہاکہ سیکورٹی فورسز نے فوری طورپر ملی ٹینٹ مخالف آپریشن شروع کیا اور فرار ہونے کے راستو ں پر پہرے بٹھادئے۔ان کے مطابق۱۷جولائی کی سہ پہر کو جوں ہی سیکورٹی فورسز کے اہلکار مشتبہ مقام کے نزدیک پہنچے تو وہاں پر موجود جنگجووں نے فورسز پر اندھا دھند فائرنگ شروع کی ۔انہوں نے مزید بتایا کہ سیکورٹی فورسز نے بھی پوزیشن سنبھال کر جوابی کارروائی کا آغاز کیا جس دوران شدید گولیوں کا تبادلہ شروع ہوا۔
بریگیڈیئر سنگھ کے مطابق رات بھر سیکورٹی فورسز اور ملی ٹینٹوں کے مابین گولیوں کا تبادلہ جاری رہا۔انہوں نے کہاکہ ملی ٹینٹوں کو مار گرانے کی خاطر پیرا کمانڈوز کی بھی خدمات حاصل کی گئیں۔انہوں نے مزید بتایا کہ۱۸جولائی کی صبح سیکورٹی فورسز نے تصادم کی جگہ تلاشی آپریشن شروع کیا جس دوران چار غیر ملکی جنگجووں کی لاشیں برآمد کی گئیں ۔ان کے مطابق جاں بحق جنگجوؤں کے قبضے سے بڑی مقدار میں اسلحہ وگولہ بارود اور قابل اعتراض مواد برآمد کرکے ضبط کیا گیا۔
فوجی کمانڈر نے کہاکہ تصادم کی جگہ چار رائفلیں، آٹھ میگزین‘دو پستول‘تین پستول میگزین اور۱۵۲گولیوں کے راونڈ برآمد کئے گئے ۔
بریگیڈیئرسنگھ کے مطابق رائفلوں پر چینی کمپنی اور پستول پر پاکستانی نشانات پائے گئے ۔ انہوں نے کہاکہ جدید ہتھیاروں سے لیس ملی ٹینٹ پونچھ اوراس کے ملحقہ علاقوں میں تخریبی کارروائیوں کو انجام دے سکتے تھے لیکن اس سے قبل ہی سیکورٹی فورسز نے انہیں ہلاک کیا۔انہوں نے کہاکہ فوج اور پولیس نے مل کر اس آپریشن کو انجام تک پہنچایا ۔
پاکستان کی طرف اشارہ کرتے ہوئے فوجی کمانڈر نے کہاکہ ہمارا پڑوسی یہاں پر امن و امان کو درہم برہم کرنے کی خاطر ملی ٹینٹوں کو بھیج رہا ہے ۔انہوں نے کہاکہ سرحدوں پر تعینات افواج چو بیس گھنٹے اپنی خدمات انجام دے رہے ہیں اور کسی کو بھی اس طرف آنے کی اجازت نہیں دی جائے گی۔ان کے مطابق ایل او سی پر تعینات افواج اس پار کشمیر پر نظر بنائے رکھے ہوئے ہیں ۔
مقامی لوگوں کی تعریف کرتے ہوئے بریگیڈیئر سنگھ نے کہاکہ اس آپریشن کے دوران مقامی لوگوں نے کلیدی کردار ادا کیا۔انہوں نے مزید بتایا کہ لوگوں کے تعاون سے ہی چار غیر ملکی جنگجووں کو مار گرانے میں کامیابی ملی ہے ۔
فوجی کمانڈر کا کہنا تھا کہ مقامی لوگ سیکورٹی ایجنسیوں کو اپنا بھر پور تعاون فراہم کر رہے ہیں جس سے یہ ظاہر ہوتا ہے کہ جموں وکشمیر کے لوگ محب وطن ہیں ۔