امر ناتھ یاترا:ڈی جی بی ایس ایف کا پہلگام میں سیکورٹی صورتحال کا جائزہ

سرینگر//
بارڈر سیکورٹی فورس (بی ایس ایف)کے ڈائریکٹر جنرل‘ نتن اگروال نے بدھ کے روز کہا کہ سالانہ امر ناتھ یاترا کو بخوبی پایہ تکمیل تک پہنچانے کی خاطر بی ایس ایف جوان اپنی خدمات خوش اسلوبی کے ساتھ انجام دے رہے ہیں۔
بی ایس ایف کے ایک ترجمان نے بتایا کہ ڈائریکٹر جنرل اگروال نے جنوبی کشمیر کے پنجہ ترنی میں تعینات بی ایس ایف جوانوں کے ساتھ گفت وشنید کی۔
ترجمان نے کہاکہ ڈی جی بی ایس ایف نے سینئر آفیسران کے ساتھ میٹنگ کی جس دوران سالانہ امر ناتھ جی یاترا کے حوالے سے بی ایس ایف کی تعیناتی کے بارے میں انہیں جانکاری فراہم کی گئی ۔ان کے مطابق ڈی جی بی ایس ایف آئی جی کے ہمراہ پہلگام گئے اور امر ناتھ یاترا کے سلسلے میں بی ایس ایف کی تعیناتی کا بچشم جائزہ لیا۔
بی ایس ایف ترجمان نے بتایا کہ ڈی جی نے سی آر پی ایف اور بی ایس ایف کے سینئر عہدیداروں کے ساتھ سیکورٹی فورسز کی تعیناتی کے بارے میں بھی جانکاری حاصل کی ۔
ترجمان کے مطابق ڈی جی بی ایس ایف نے پنجہ ترنی کا دورہ کیا اور وہاں پر یاتریوں کو دی جارہی سہولیات کے بارے میں بھی آگاہی حاصل کی ۔ ترجمان نے بتایا کہ بدھ کے روز بی ایس ایف ڈائریکٹر جنرل پوترا گھپا کیلئے روانہ ہوئے ۔
پوترا گھپا تک جگہ جگہ بی ایس ایف کی تعیناتی کے بارے میں ڈائریکٹر جنرل نے از خود جائزہ لیا اور مختلف مقامات پر بی ایس ایف آفیسران کے ساتھ بات چیت کی۔انہوں نے اس موقع پر کہاکہ سخت موسمی صورتحال کے باوجود بھی بی ایس ایف جوان اپنی خدمات خوش اسلوبی کے ساتھ انجام دے رہے ہیں۔
اگروال نے مختلف سیکورٹی ایجنسیوں کے درمیان آپسی تال میل کی بھی ستائش کی ۔ انہوں نے کہاکہ یاتریوں کو کسی قسم کی مشکل کا سامنا نہ کرنا پڑے اس کے لئے تمام تر انتظامات کئے گئے ہیں۔
بتادیں کہ یکم جولائی سے شروع ہوئی امر ناتھ یاترا میں ابتک ایک لاکھ ۴۰ہزار یاتریوں نے پوترا گھپا کے درشن کئے ہیں۔