انسداد تجاوزات مہم :کٹھوعہ میں شاپنگ پال منہدم ، لوگوں سراپا احتجاج

جموں//
جموںکشمیر کے کٹھوعہ ضلع میں جمعہ اعلیٰ الصبح انتظامیہ نے غیر قانونی طورپر تعمیر کئے گئے ایک شاپنگ مال کو منہدم کیا ۔
معلوم ہوا ہے کہ شاپنگ مال کو منہدم کرنے کے خلاف لوگوں نے سڑکوں پر احتجاجی مظاہرئے کئے ۔
اطلاعات کے مطابق کٹھوعہ ضلع کے شہیدی چوک میں جمعے کی صبح ضلعی انتظامیہ کی ہدایت پر ایک شاپنگ مال کو منہدم کیا گیا۔
ضلعی انتظامیہ کا کہنا ہے کہ غیر قانونی طورپر شاپنگ مال کو تعمیر کیا گیا تھا اور اس کو منہدم کرنا ناگزیر بن گیا تھا۔
مقامی لوگوں نے بتایا کہ جمعہ صبح چار بجے کے قریب سیکورٹی فورسز نے شہیدی چوک کٹھوعہ کو محاصرے میں لے کر لوگوں کے چلنے پھرنے پر پابندی عائد کی۔
لوگوںنے بتایا کہ کسی کو بھی شاپنگ مال کے نزدیک جانے کی اجازت نہیں دی گئی اور غیر قانونی طورپر ایک بڑے شاپنگ مال کو جے سی بیز کے ذریعے منہدم کیا گیا۔
مظاہرین کا کہنا تھا کہ ضلعی انتظامیہ کو چاہئے تھا کہ شاپنگ مال کو منہدم کرنے سے قبل مالک کو نوٹس بھیجتے تاہم ایسا نہیں کیا گیا بلکہ بغیر اطلاع ہی اس بڑے شاپنگ مال کو منہدم کیاگیا جس وجہ سے مالک کو کروڑوں کا نقصان ہوا ہے ۔
لوگوں کی ایک بڑی تعداد نے ایس ایس پی کٹھوعہ کے دفتر کے باہر بھی احتجاجی دھرنا دیا تاہم انتظامیہ کا کہنا ہے کہ قانون کے مطابق کارروائی عمل میں لائی گئی ۔