سرینگر؍۲۷؍اکتوبر
وزیر اعلیٰ عمر عبداللہ نے آج یہاں سول سکریٹریٹ میں کابینہ میں نئے شامل کیے گئے وزراء کے دفتری چیمبروں کا دورہ کیا اور انہیں عہدہ سنبھالنے پر مبارکباد دیتے ہوئے ان کی کامیاب مدتِ کار کے لیے نیک خواہشات کا اظہار کیا۔
وزیر اعلیٰ نے ذاتی طور پر تمام نئے وزراء کے دفتری چیمبروں میں جاکر علی محمد ساگر، سیف اللہ میر، شمیم فردوس اور الطاف احمد وانی کو مبارکباد دی۔ انہوں نے امید ظاہر کی کہ تمام وزراء پوری لگن اور خلوص کے ساتھ اپنی ذمہ داریاں نبھائیں گے اور مؤثر حکمرانی کے ساتھ جموں و کشمیر کی مجموعی ترقی میں اپنا کردار ادا کریں گے۔
اجتماعی کوششوں کی اہمیت پر زور دیتے ہوئے عمر عبداللہ نے کہا کہ حکومت کے ترقیاتی ایجنڈے کو آگے بڑھانے اور عوامی فلاح و بہبود کو یقینی بنانے میں وزراء کا کردار اہم ہے۔ انہوں نے امید ظاہر کی کہ وزراء کا تجربہ اور عزم عوامی توقعات کو پورا کرنے کے لیے حکومت کی کوششوں کو مزید تقویت بخشے گا۔
نئے وزراء نے وزیر اعلیٰ کی آمد اور حوصلہ افزا کلمات پر ان کا شکریہ ادا کیا اور یقین دلایا کہ وہ ان کی قیادت میں اجتماعی طور پر کام کرتے ہوئے عوام سے کیے گئے وعدوں کو پورا کرنے کے لیے پُرعزم ہیں۔
اس موقع پر نائب وزیر اعلیٰ سریندر کمار چودھری، وزراء سکینہ ایتو اور جاوید احمد ڈار، وزیر اعلیٰ کے مشیر ناصر اسلم وانی، ڈائریکٹر اسٹیٹس کشمیر محمد اشرف حقاک اور دیگر اعلیٰ افسران و عہدیداران بھی ان کے ہمراہ تھے۔
واضح رہے کہ اس سے قبل آج لیفٹیننٹ گورنر منوج سنہا نے لوک بھون میں نئے شامل کیے گئے وزراء کو عہدے اور رازداری کا حلف دلایا۔
۔۔۔۔۔۔(ایجنسیاں )
