لیہہ/جموں؍۲۷؍اکتوبر
وزیر اعظم نریندر مودی کی جانب سے پروجیکٹ ہِم سروور کے تحت لداخ میں۴۰ آبی ذخائر کا افتتاح کرنے کے چند روز بعد، لیفٹیننٹ گورنر ونے کمار سکسینہ کی قیادت والی انتظامیہ نے لیہہ اور کرگل اضلاع میں پانچ نئے آبی ذخائر کی تعمیر کا کام شروع کردیا ہے۔ ایک سرکاری عہدیدار نے منگل کو یہ اطلاع دی۔
عہدیدار کے مطابق، لیہہ ضلع میں شیے تھانگ، اسٹاکمو گاؤں اور آرزو تھکسے میں آبی ذخائر تعمیر کیے جارہے ہیں، جبکہ کرگل ضلع کے بارچے اور اپاتی گاؤں میں دو تالاب تیار کیے جارہے ہیں۔ کرگل کا یہ علاقہ پانی کی شدید قلت سے دوچار ہے، جس کے باعث دیہاتی بہتر حالاتِ زندگی کی تلاش میں نقل مکانی کرنے پر مجبور ہورہے ہیں۔
انہوں نے بتایا کہ لیفٹیننٹ گورنر کے حالیہ دوروں کے بعد ان مقامات پر تعمیراتی کام شروع کیا گیا۔ دوروں کے دوران مقامی باشندوں نے پانی کی قلت کا مسئلہ اٹھاتے ہوئے اس کے حل کے لیے انتظامیہ سے مداخلت کی اپیل کی تھی۔
سرکاری عہدیدار کے مطابق، ان پانچ آبی ذخائر میں مجموعی طور پر تقریباً ڈیڑھ کروڑ لیٹر برفانی پگھلاؤ کا پانی ذخیرہ کیا جاسکے گا۔ اس اقدام کا مقصد موسم کے دوران بہنے والے پانی کو محفوظ کرنا، آبپاشی کی صلاحیت میں اضافہ کرنا اور لداخ کے نازک سرد صحرائی ماحولیاتی نظام کو مضبوط بنانا ہے۔
انہوں نے کہا کہ یہ منصوبہ خطے میں آبی تحفظ کو مستحکم کرنے، ماحولیات کے تحفظ کو فروغ دینے اور مقامی آبادی کے ذرائع معاش کو بہتر بنانے کے لیے مرکز کے زیر انتظام علاقے کی انتظامیہ کی وسیع تر کوششوں کا حصہ ہے۔
عہدیدار نے مزید کہا کہ یہ پہل پانی کے پائیدار انتظام کو فروغ دینے اور مرکز کے زیر انتظام علاقے لداخ کے لیے خود کفیل مستقبل کی تعمیر کے انتظامیہ کے عزم کو بھی تقویت دیتی ہے۔
۔۔۔۔۔(ایجنسیاں )
