سابق ایم ایل اے کیخلاف ریپ کیس میں پولیس تحقیقات پر روک

سرینگر//
جموں و کشمیر اور لداخ ہائی کورٹ نے حال ہی میں سابق رکن قانون ساز اسمبلی (ایم ایل اے ) شعیب لون کے خلاف درج ایک ریپ کیس میں پولیس تحقیقات پر روک لگا دی ہے ۔
سابق رکن اسمبلی کے خلاف یہ کیس ایک خاتون نے درج کیا تھا جو ان کی اہلیہ ہونے کا دعویٰ کرتی ہے ۔
جسٹس راجنیش اوسوال نے کہا کہ متاثرہ کے بیان کی ریکارڈنگ کو چھوڑ کر تحقیقات پر روک لگا دی جائے گی۔
ہائی کورٹ حکمنامے میں کہا گیا’’اعتراضات سے مشروط اور بینچ کے سامنے اگلی سماعت کی تاریخ تک،استغاثہ کے بیان کی ریکارڈنگ کے بجز تحقیقات پر روک ہوگی‘‘۔
عدالت تعزیرات ہند کی دفعہ۳۷۶(ریپ)‘۳۴۲(غلط طریقے سے قید) اور۵۰۶(مجرمانہ دھمکی) کے تحت درج ایک ایف آئی آر کو منسوخ کرنے کی درخواست کی سماعت کر رہی تھی۔
یہ ایف آئی آر پولیس اسٹیشن بارہمولہ میں ایک خاتون نے درج کی تھی جس نے شعیب لون کی اہلیہ ہونے کا دعویٰ کیا۔
شعیب لون کے وکیل کا دعویٰ ہے کہ یہ ایف آئی آر سابق ایم ایل اے کو ہراساں کرنے کے لئے درج کیا گیا ۔
دوسری جانب سرکاری وکیل جہانگیر احمد ڈار نے تفصیلی جواب داخل کرنے کی مہلت مانگی ہے اور کہا ہے کہ پولیس کی جانب سے شکایت کنندہ کو بار بار بیان ریکارڈ کرانے کیلئے پیش ہونے کی درخواست کی گئی لیکن وہ پیش نہیں ہوئیں۔
عدالت نے شکایت کنندہ کے نام نوٹس جاری کرتے ہوئے جواب طلب کیا ہے ۔