کٹھوعہ میں جموں وکشمیر بینک کے۷نئے براچ قائم ہوں گے :جتندر

جموں//
مرکزی وزیر ڈاکٹر جتندر سنگھ کا کہنا ہے کہ جموں کشمیر کے ضلع کٹھوعہ میں جموں و کشمیر بینک کی۷نئی شاخوں کو قائم کیا جائے گا۔
ڈاکٹر سنگھ نے کہا کہ حکام نے ان سات نئی شاخوں کے قیام کو منظوری دی ہے ۔
مرکزی وزیر نے یہ جانکاری اپنے ٹیوٹر ہینڈل پر ٹویٹ کرکے فراہم کی۔انہوں نے کہا’’ہمارے پارلیمانی دفتر کی طرف سے جموں کشمیر بینک کے چیئر مین بلدیو پرکاش کو پیش کردہ ضرورت فہرست ،جہاں بینک برانچ قائم کرنا لوگوں کا مطالبہ تھا، کے جواب میں ضلع کٹھوعہ میں۷ برانچوں کو منظوری دی گئی ہے ‘‘۔
ڈاکٹر سنگھ کا ٹویٹ میں کہنا تھا کہ جن علاقوں میں نئے بینک برانچ قائم کئے جا رہے ہیں ان میں دھر مہان پور‘ہٹ‘ ڈوگن‘ لوانگ‘چکرا‘بدھی اور شیتل نگر (بھون) شامل ہیں۔
ڈاکٹر جتندر سنگھ نے کہا کہ اودھمپور، ڈوڈہ، کٹھوعہ لوک سبھا حلقہ انتخاب کے دوسرے اضلاع میں بھی نئے بینک برانچ قائم کئے جانے والے ہیں۔
دریں اثنا لوگوں نے مرکزی وزیر کے اس اقدام کی سراہنا کی ہے اور کہا ہے کہ ان علاقوں میں نئے بینک برانچ قائم کرنے کی اشد ضرورت تھی۔انہوں نے کہا کہ ان بینک برانچوں سے لوگوں کو کافی آرام پہنچے گا۔