سری نگر میں جی 20میٹنگ کے دوران اینٹی ڈرون ٹیکنالوجی اور خصوصی فورسز کی تعیناتی کا فیصلہ

سرینگر/۱۱اپریل
سرینگر میں جی 20میٹنگ کے پیش نظر سیکورٹی کے قبل از وقت پختہ انتظامات کئے جارہے ہیں۔
معلوم ہوا ہے کہ سیکورٹی ایجنسیوں کی ایک اعلیٰ سطحی میٹنگ کے دوران اینٹی ڈرون ٹیکنالوجی، خصوصی فورسز کی تعیناتی کے ساتھ ساتھ گلمرگ اور سری نگر میں اضافی اہلکاروں کی تعیناتی کا بھی فیصلہ لیا گیا۔
ذرائع نے بتایا کہ سرینگر میں جی 20میٹنگ کے انعقاد کو لے کر تیاریاں زور و شور سے شروع کی گئی ہے جہاں ایک طرف جموں وکشمیر انتظامیہ نے شہر کو سجانے اور سنوارنے کی خاطر مختلف پروجیکٹ بیک وقت شروع کئے وہی سیکورٹی کے حوالے سے بھی پختہ انتظامات کئے جارہے ہیں۔
ذرائع کا کہنا ہے کہ سری نگر میں جی 20میٹنگ کے پر امن انعقاد کی خاطر سیکورٹی ایجنسیوں کے درمیان بھی میٹنگوں کا سلسلہ شروع ہو چکا ہے ۔
مرکزی سیکورٹی اداروں اور جموں وکشمیر پولیس کے سینئر عہدیداروں کے درمیان ایک اعلیٰ سطحی میٹنگ منعقد ہوئی جس میں سیکورٹی کے حوالے سے کئی اہم فیصلے لئے گئے ۔
میٹنگ کے دوران سرینگر سمیت وادی کے دیگر اضلاع میں سیکورٹی کے پختہ انتظامات کرنے کا فیصلہ لیا گیا۔
معلوم ہوا ہے کہ اینٹی ڈرون ٹیکنالوجی ، خصوصی فورسز کی تعیناتی کے ساتھ ساتھ سری نگر اور گلمرگ میں اضافی اہلکاروں کی تعیناتی کا بھی فیصلہ لیا گیا۔
سرینگر میں جگہ جگہ اضافی سیکورٹی فورسز اہلکاروں کو تعینات کرنے کو بھی ہری جھنڈی دکھائی گئی ہے ۔
چونکہ سری نگر میں اس طرح کی بین الاقوامی میٹنگ پہلی دفعہ ہونے جارہی ہے اس کے لئے سبھی طرح کے انتظامات کئے جارہے ہیں۔
بتادیں کہ سری نگر میں 22سے 25مئی تک جی 20میٹنگ منعقد ہوگی جس میں بین الاقوامی لیڈران کی شرکت متوقع ہے ۔22مئی کومیٹنگ کے شرکاءسرینگر پہنچیں گے ، 23مئی کو سری نگر میں میٹنگ منعقد ہوگی اور 24مئی کو میٹنگ کے شرکاءسیاحتی مقامات بشمول جھیل ڈل کے قدرتی نظاروں سے لطف اندوز ہونگے اور 25مئی کو واپس نئی دہلی روانہ ہونگے ۔