بی جے پی 2024 میں 300 سے زیادہ ایل ایس سیٹیں جیت لے گی:امیت شاہ

سرینگر/۱۱اپریل
مرکزی وزیر داخلہ‘ امت شاہ نے منگل کے روز زور دے کر کہا کہ بھارتیہ جنتا پارٹی(بی جے پی) اگلے سال ہونے والے عام انتخابات میں ملک بھر میں 300 سے زیادہ لوک سبھا سیٹیں جیت لے گی اور وزیر اعظم نریندر مودی کی قیادت میں مسلسل تیسری بار اقتدار میں واپس آئے گی۔
ڈبرو گڑھ میں ایک ریلی سے خطاب ‘جہاں انہوں نے بی جے پی کے دفتر کا سنگ بنیاد رکھا‘کرتے ہوئے شاہ نے اعتماد ظاہر کیا کہ زعفرانی پارٹی شمال مشرقی ریاست میں 14 لوک سبھا سیٹوں میں سے 12 پر کامیابی حاصل کرے گی۔
شاہ نے کہا”نریندر مودی 2024 کے لوک سبھا انتخابات میں پارٹی کو 300 سے زیادہ سیٹیں جیتنے کے ساتھ مسلسل تیسری بار وزیر اعظم بنیں گے۔“
پارلیمنٹ کے ایوان زیریں میں 543 نشستیں ہیں۔
کانگریس پر سخت حملہ کرتے ہوئے بی جے پی کے سینئر لیڈر نے کہا کہ شمال مشرق کو کبھی کانگریس کا قلعہ سمجھا جاتا تھا لیکن راہول گاندھی کی یاترا (بھارت جوڑو یاترا) کے باوجود پارٹی تین ریاستوں میں حالیہ اسمبلی انتخابات میں اچھی کارکردگی دکھانے میں ناکام رہی۔
حال ہی میں میگھالیہ، تریپورہ اور ناگالینڈ میں اسمبلی انتخابات ہوئے۔ بی جے پی نے تریپورہ میں حکومت بنائی، اور دیگر دو ریاستوں میں اتحادی شراکت دار کے طور پر اقتدار میں آئی۔
شاہ نے آسام کے لوگوں کا شکریہ ادا کیا، جو شمال مشرق کی پہلی ریاست تھی جس نے بی جے پی کو مینڈیٹ دیا۔
اپنے دورہ برطانیہ کے دوران راہول گاندھی کے متنازعہ ریمارکس کی طرف اشارہ کرتے ہوئے، شاہ، جو پڑوسی ریاست اروناچل پردیش سے ڈبرو گڑھ پہنچے، کہا”انہوں نے (گاندھی) غیر ملکی سرزمین سے ہندوستان کی توہین کی۔ اگر وہ جھوٹ بول کر ملک اور حکومت کو بدنام کرتے رہے تو، شمال مشرق میں دروازہ دکھائے جانے کے بعد کانگریس کو پورے ملک سے وائٹ واش کردیا جائے گا“۔
وفاقی وزیر داخلہ نے کہا”وزیر اعظم نریندر مودی کو گالی دینے کا کوئی فائدہ نہیں ہے کیونکہ ہر ہندوستانی ان کی اچھی صحت کےلئے دعا کر رہا ہے۔ وہ (کانگریس) جتنا زیادہ ہمارے وزیر اعظم کو برا بھلا کہیں گے، اتنا ہی کمل (بی جے پی کا انتخابی نشان) کھلے گا“۔
شاہ نے کہا کہ متنازعہ آرمڈ فورسز (خصوصی اختیارات) ایکٹ، 1958 یا AFSPA کو آسام کے 70 فیصد علاقے سے ہٹا دیا گیا ہے، جب کہ بوڈولینڈ اور کاربی انگلونگ کے علاقے پرامن ہیں اور اس کے پڑوسی صوبوں کے ساتھ ریاست کے سرحدی تنازعات کو حل کیا جا رہا ہے۔
شاہ نے اپریل کو گوہاٹی میں منعقد ہونے والے ایک میگا ایونٹ کا ذکر کرتے ہوئے کہا،”پہلے، آسام تحریک اور دہشت گردی کے لیے جانا جاتا تھا لیکن اب وہاں امن ہے اور لوگ بیہو موسیقی کی دھڑکنوں پر رقص کر رہے ہیں۔
شاہ نے کہا کہ آسام میں بی جے پی کے دور حکومت میں 41,000 سے زیادہ لوگوں کو روزگار دیا گیا ہے، باجرہ مشن کے لیے 25,000 ہیکٹر اراضی مختص کی گئی ہے، پام آئل کی پیداوار کے لیے دو لاکھ ہیکٹر اور 12 لاکھ خاندانوں کو ہینڈلوم فراہم کیے گئے ہیں۔
وفاقی وزیر داخلہ نے کہا کہ آسام میں بی جے پی حکومت پہلے ہی 12 میڈیکل کالج قائم کر چکی ہے اور 12 مزید پائپ لائن میں ہیں، جبکہ مودی رونگالی بیہو کے موقع پر ریاست میں ایمس کا افتتاح کریں گے۔
شاہ نے کہا”مرکز میں پی ایم مودی کی قیادت میں بی جے پی کی ڈبل انجن والی حکومت اور آسام میں سربانند سونووال اور بعد میں ہمنتا بسوا سرما نے ریاست میں ترقی، امن اور سلامتی کی راہ ہموار کی ہے“۔
وزیر داخلہ بعد میں ڈبرو گڑھ ہوائی اڈے سے ایک پرواز میں سوار ہوکر ریاست سے نئی دہلی روانہ ہوگئے۔