حج۲۰۲۶: درخواستیں اگلے ہفتے سے شروع ہوں گی:رجیجو

نئی دہلی//
اقلیتی امور کے مرکزی وزیر کرن رجیجو نے جمعہ کو کہا کہ حج۲۰۲۶کی تیاریاں شروع کر دی گئی ہیں اور ایک ہفتہ بعد درخواست دینے کا عمل شروع ہو جائے گا۔
رجیجو نے آج یہاں حج جائزہ میٹنگ کے بعد نامہ نگاروں کو بتایا’’ہم نے آج سے حج۲۰۲۶کی تیاریوں کا باضابطہ طور پرآغاز کر دیا ہے ۔ مجھے یہ کہتے ہوئے خوشی ہو رہی ہے کہ حج۲۰۲۵کو حالیہ تاریخ میں سب سے زیادہ منظم اور کامیاب ترین حج سفر میں سے ایک سمجھا جا سکتا ہے ‘‘۔
مرکزی وزیر نے کہا کہ گزشتہ سال اور اس سے پہلے حج کے دوران کئی واقعات پیش آئے ۔ اس بار۶۴؍افراد کی موت ہوئی ہے اور پچھلے سال یہ تعداد ۲۰۰سے زیادہ تھی۔اس بارمختلف وجوہات سے۶۴؍افراد کی موت ہوئی ہے ۔ حج کمیٹی کے انتظامات میں کمی کی وجہ سے کسی کی جان نہیں گئی۔
رجیجو نے کہا کہ حج۲۰۲۶کیلئے درخواست کا عمل ایک ہفتہ کے بعد شروع ہوگا۔ میری لوگوں سے گزارش ہے کہ وہ اپنی درخواستیں وقت پر جمع کریں تاکہ مستقبل میں انھیں کسی قسم کی پریشانی کا سامنا نہ کرنا پڑے ۔ حج کے دوران مردوں اور خواتین کے لیے الگ الگ رہائش کے حوالے سے تجاویز موصول ہوئی ہیں جن پر حکومت غور کر رہی ہے ۔
مرکزی وزیر نے کہا کہ۶۵سال سے زائد عمر کے شخص کے لیے حج پر اپنے ساتھی کو لے جانا لازمی ہے ۔ انہوں نے کہا کہ حج میں ۴۰سے۴۵دن لگتے ہیں لیکن کم دنوں میں حج کرانے پر بھی غور کیا جا رہا ہے ۔ انہوں نے کہا کہ حج کے پانچ دن اہم ہوتے ہیں اور ان پانچ دنوں کے علاوہ تمام عمل کو کم وقت میں مکمل کرنے پر غور کیا جا رہا ہے ۔
مرکزی وزیر نے کہا’’حج پر جانے والے لوگوں کے سنگل نام والوں کو پریشانی کا سامنا کرنا پڑتا ہے ۔ اگر پاسپورٹ میں ایک ہی نام ہے تو اسے درست کرنے کی ضرورت ہے تاکہ ویزا کے عمل میں کوئی مسئلہ نہ ہو۔‘‘