کشمیر میں۵جولائی تک موسم گرم و مرطوب رہنے کا امکان

سرینگر//
محکمہ موسمیات کی پیش گوئی کے مطابق وادی کشمیر میں اگلے دو دنوں کے دوران موسم گرم اور مرطوب رہنے کا امکان ہے ۔ تاہم اس دوران گرج چمک کے ساتھ کہیں کہیں ہلکی بارشوں کو خارج از امکان قرار نہیں دیا جا سکتا ہے ۔
موسمیات محکمے کے ایک ترجمان نے بتایا کہ وادی میں ۳؍اور۴جولائی کو موسم گرم اور مرطوب رہنے کا امکان ہے تاہم اس دوران کہیں کہیں گرج چمک کے ساتھ ہلکی بارشیں متوقع ہیں۔
ترجمان نے کہا کہ ۵جولائی کو بھی موسم گرم اور ابر آلود رہ سکتا ہے جبکہ شام دیر گئے گرج چمک کے ساتھ ہلکی سے درمیانی درجے کی بارشوں کا امکان ہے ۔
ان کا کہنا ہے کہ۶سے۸جولائی تک موسم عام طور پر ابر آلود رہ سکتا ہ اور اس دوران کہیں کہیں رک رک کر ہلکی سے درمیانی درجے کی بارشوں کا امکان ہے جبکہ اس دوران جموں صوبے میں کہیں کہیں تیز اور بھاری بارشیں ہوسکتی ہیں۔
ترجمان نے بتایا کہ۹؍اور۱۰جولائی کو بھی کہیں کہیں گرج چمک کے ساتھ ہلکی سے درمیانی درجے کی بارشوں کا امکان ہے ۔انہوں نے کہا کہ بعد ازاں۱۱؍اور۱۲جولائی کو موسم ایک بار پھر گرم اور مرطوب رہ سکتا ہے ۔
محکمے نے اپنی ایڈوائزری میں کہا ہے کہ۶سے ۸جولائی تک کچھ کمزور مقامات پر سیلابی ریلے آنے ، لینڈ سلائنڈنگ اور چٹانیں کھسکنے کے خطرات ہیں۔انہوں نے کہا کہ اس دوران دریا ئوں، ندی نالوں میں پانی کی سطح میں اضافہ ہوسکتا ہے اور نشیبی علاقوں میں پانی جمع ہونے کا بھی امکان ہے ۔