ہند،پاک معمول کے تعلقات دہشت گردی سے پاک ماحول میں ہی بحال ہو سکتے ہیں

نئی دہلی/14 اکتوبر

ہندوستان نے آج اس بات کا اعادہ کیا کہ پاکستان کے ساتھ معمول کے تعلقات کی بحالی دہشت گردی سے پاک ماحول میں ہی ہوسکتی ہے ۔

وزارت خارجہ کے ترجمان ارندم باگچی نے یہاں معمول کی پریس بریفنگ میں ایک سوال کے جواب میں یہ بات کہی۔ قازقستان کے دارالحکومت آستانہ میں منعقدہ کانفرنس فار کنفیڈنس بلڈنگ اینڈ ڈائیلاگ ان ایشیا (ایس آئی سی اے ) کے اجلاس میں پاکستان کی طرف سے جموں و کشمیر کا مسئلہ اٹھانے پر وزیر مملکت برائے امور خارجہ میناکشی لیکھی کے ردعمل کے بارے میں ایک سوال کا جواب دیتے ہوئے باگچی نے کہا”آپ نے محترمہ لیکھی کا بیان دیکھا ہے ، جنہوں نے وزیر اعظم کے خصوصی ایلچی کے طور پر شرکت کی۔ میں اس سے زیادہ کچھ کہنے کی پوزیشن میں نہیں ہوں کیونکہ ہم نے پاکستانی سرزمین سے ہونے والی دہشت گردی پر اپنا موقف واضح کیا ہے “۔

باگچی نے کہا”ہم نے ہمیشہ کہا ہے کہ ہم پاکستان کے ساتھ معمول کے تعلقات چاہتے ہیں۔ لیکن یہ دہشت گردی سے پاک پرامن ماحول میں کیا جا سکتا ہے “۔

کینیڈا میں پاکستان کے حمایت یافتہ خالصتانی ریفرنڈم کے حوالے سے پوچھے گئے سوال کے جواب میں انہوں نے کہا کہ ہندوستان مخالف عناصر کی جانب سے مبینہ ریفرنڈم کے انعقاد پر ہمارا موقف بالکل واضح ہے اور اس سے کینیڈین حکومت کو آگاہ کر دیا گیا ہے ۔ ہم اس اطلاعات کو پہلے بھی عوامی طور پر شیئر کر چکے ہیں۔

باگچی نے کہا کہ ہم نے یہ مسئلہ دہلی میں کینیڈین ہائی کمیشن اور اوٹاوا میں اپنے ہائی کمیشن کے ذریعے کینیڈین حکومت کے سامنے اٹھایا ہے ۔ ہم دونوں جگہوں پر اس مسئلے کو اٹھاتے رہیں گے ۔