سری نگر؍۱۸ ستمبر
منشیات سے متعلق سرگرمیوں کے خلاف جاری کارروائی کے ایک حصے کے طور پر جموں و کشمیر پولیس نے شوپیاں میں ایک رہائشی مکان منسلک کر دیا ہے، جو۱۰۶۵ مربع فٹ اراضی پر تعمیر کیا گیا ہے اور خسرہ/سروے نمبر۱۳۲۷کے تحت گاؤں ملہورا میں واقع ہے۔ اس جائیداد کی مالیت۱۶ لاکھ۵۶ ہزار۳۸۵ روپے بتائی گئی ہے اور یہ غلام حسن شاہ کے لے پالک بیٹے فاروق احمد شاہ، ساکن ملہورا، کی ملکیت ہے۔ اس کے علاوہ۴ لاکھ۷۳ ہزار۵۰۰ روپے نقد رقم بھی منجمد/ضبط کرلی گئی ہے۔
پولیس کے مطابق رہائشی جائیداد اور نقد رقم کی نشاندہی ایسی املاک کے طور پر ہوئی ہے جو منشیات اور نشہ آور اشیا کی غیر قانونی تجارت سے حاصل ہونے والی آمدنی سے خریدی گئی تھیں۔
چنانچہ زیناپورہ پولیس تھانے میں درج ایک ایف آئی آر نمبر کے سلسلے میں این ڈی پی ایس ایکٹ کی متعلقہ دفعہ کے تحت رہائشی مکان اور نقد رقم کو منسلک/منجمد کردیا گیا ہے۔
پولیس کے مطابق جائیداد منسلک کرنے اور رقم منجمد کرنے کی کارروائی ایک باقاعدہ تشکیل دی گئی پولیس ٹیم، ایگزیکٹو مجسٹریٹ، لمبردار اور چوکیدار کی موجودگی میں انجام دی گئی، تاکہ مقررہ قانونی طریقہ کار پر عمل درآمد اور کارروائی کے دوران شفافیت کو یقینی بنایا جاسکے۔
پولیس نے منشیات کے ناسور کے خاتمے کے عزم کا اعادہ کرتے ہوئے کہا کہ کارروائی کا مقصد صرف منشیات سے متعلق غیر قانونی سرگرمیوں میں ملوث افراد کے خلاف کارروائی کرنا نہیں بلکہ ان سرگرمیوں سے منسلک مالی اثاثوں اور جائیدادوں کو بھی نشانہ بنانا ہے۔
پولیس نے عام لوگوں پر زور دیا کہ وہ منشیات کی اسمگلنگ یا اس سے متعلق کسی بھی سرگرمی کے بارے میں معلومات پولیس کے ساتھ شیئر کرنے کے لیے آگے آئیں۔
۔۔۔۔۔(ایجنسیاں )
