مودی نے ایساجموں و کشمیر کو بنانا ہے جہاں دہشت گردی کی وجہ سے کوئی جانی نقصان نہ ہو: امت شاہ

نئی دہلی/۲۴فروری
مرکزی وزیر داخلہ امیت شاہ نے پیر کے روز کہا کہ جموں و کشمیر میں امن ہے اور یہ امن مستقل ہونا چاہئے۔” نریندر مودی حکومت کا مقصد ایسا جموں کشمیر بنانا ہے جہاں دہشت گردی کی وجہ سے کوئی جان نہ جائے“۔
’وطن کو جانو ‘یوتھ ایکسچینج پروگرام کے تحت قومی راجدھانی آنے والے جموں و کشمیر کے نوجوانوں سے بات چیت کرتے ہوئے شاہ نے یہ بھی کہا کہ جموں و کشمیر کے لوگوں کو کسی بھی دوسری ریاست کے لوگوں کی طرح پورے ملک پر مساوی حقوق حاصل ہیں اور پورا ہندوستان مرکز کے زیر انتظام علاقے کے لوگوں کو محبت اور احترام کی نظر سے دیکھتا ہے۔
وزیر داخلہ نے مزید کہا کہ جب دہشت گردی کا خاتمہ ہوجائے گا تو پولیس کی تعیناتی کی کوئی ضرورت نہیں ہوگی اور وہ دن دور نہیں ہے۔
ان کاکہنا تھا”جب امن ہو گا تو پولیس کی ضرورت نہیں پڑے گی۔ اس پیغام کو آپ کو اپنے دوستوں، اہل خانہ اور گاو¿وں تک پہنچانا ہے…. جب آپ گھر جائیں تو اپنے دوستوں اور پڑوسیوں کو بتائیں کہ پورا ملک امن سے رہ رہا ہے اور جموں و کشمیر کے لوگوں کو بھی امن کے ساتھ رہنا چاہئے“۔
شاہ نے کہا کہ جموں کشمیر میں امن ہے اور یہ امن مستقل ہونا چاہئے اور ہمارا مقصد جموں و کشمیر بنانا ہے جہاں دہشت گردی کی وجہ سے کوئی جانی نقصان نہ ہو۔
وفاقی وزیر داخلہ نے کہا”تشدد سے کچھ حاصل نہیں ہوتا۔ جموں و کشمیر میں دہائیوں سے جاری دہشت گردی کی وجہ سے 36,000 لوگوں نے اپنی جانیں گنوائیں“۔
شاہ نے کہا کہ وزیر اعظم نریندر مودی نے آرٹیکل 370 کو منسوخ کرکے ملک کو سب کے لئے برابر کردیا تھا اور اب جموں و کشمیر کے لوگوں کو دہلی ، راجستھان ، گجرات یا راجستھان کے لوگوں کی طرح ہندوستان میں کہیں بھی مساوی حقوق حاصل ہیں۔
ان کاکہناتھا” جموں و کشمیر پر آپ کے حقوق ہیں۔ کیا یہ اچھا نہیں ہے کہ آپ کو بھی ملک کی دیگر 29 ریاستوں پر مساوی حقوق حاصل ہیں؟ جموں و کشمیر کی طرح پورا ملک آپ کا ہے“۔
وزیر داخلہ نے کہا کہ امن سب کے لئے سب سے اہم ہے اور مودی حکومت کے تحت جموں و کشمیر میں امن اور ترقی آئی ہے ، اسپتال ، سڑکیں اور پل آئے ہیں ، بنیادی ڈھانچہ تیار کیا گیا ہے۔انہوں نے کہا کہ پورا ملک جموں و کشمیر کے لوگوں کو محبت اور احترام کی نگاہ سے دیکھتا ہے۔ اس کی وجہ یہ ہے کہ وہاں امن قائم ہے۔ امن کی وجہ سے ہی جموں و کشمیر میں ترقی ہو رہی ہے۔
شاہ نے کہا کہ ملک میں 30 ریاستیں ہیں اور جموں و کشمیر ان میں سے ایک ہے۔ انہوں نے کہا کہ یہ تمام 30 ریاستیں مل کر ہندوستان بنتی ہیں۔
ان کاکہنا تھا”ہمارا ملک ہمارا گھر ہے۔ اگر آپ جموں و کشمیر سے باہر نہیں نکلیں گے تو آپ ملک کو نہیں جان سکیں گے۔ تو، کیا آپ کو نہیں لگتا کہ آپ کو ملک کا دورہ کرنا چاہئے اور اچھی طرح سے جاننا چاہئے؟ اپنی اگلی اسکول کی تعطیلات میں، آپ کو اپنے والدین کے ساتھ کسی بھی ریاست کا دورہ کرنا چاہئے۔ اگر ضرورت ہو تو گھر پر لڑائی کریں لیکن آپ کو کسی ایک ریاست کا دورہ ضرور کرنا چاہیے“۔
وزیر داخلہ نے کہا کہ گزشتہ 10 سالوں میں جموں و کشمیر میں دہشت گردی کا خاتمہ ہوا ہے، دھماکوں اور پتھراو¿ کے واقعات ختم ہوئے ہیں اور اسکول باقاعدگی سے کھل رہے ہیں۔
شاہ نے کہا کہ پہلے کوئی تھیٹر نہیں تھا اور کوئی بھی فلم دیکھنے نہیں جا سکتا تھا۔انہوں نے کہا کہ کوئی تعزیہ جلوس نہیں تھا لیکن اب یہ سب ہو رہا ہے۔
ان کاکہنا تھا کہ بلدیاتی انتخابات ہوئے اور 36,000 لوگوں کو پنچ، سرپنچ کے طور پر منتخب کیا گیا۔ انہوں نے مزید کہا کہ یہ سب گزشتہ 10 سالوں میں ہوا ہے۔
وزیر داخلہ نے کہا کہ جب ملک ترقی کرے گا تو آپ بھی ترقی کریں گے۔ جیسے جیسے ملک ترقی کرے گا، جدید ہوگا، آپ بھی خوشحال ہوں گے۔ وزیر اعظم مودی یہی کر رہے ہیں۔
شاہ نے کہا ”دنیا کا سب سے اونچا ریلوے پل اب جموں و کشمیر میں واقع ہے، ایشیا کی سب سے لمبی سرنگ مرکز کے زیر انتظام علاقے میں واقع ہے۔ یہ واحد جگہ ہے جہاں دو ایمز اور دو آئی آئی ایم ہیں“۔انہوں نے کہا کہ گزشتہ 10 سالوں میں جموں و کشمیر میں 24 کالج ، آٹھ یونیورسٹیاں قائم کی گئی ہیں۔
وزیر داخلہ نے نوجوانوں سے یہ بھی کہا کہ وہ اپنی پڑھائی کو بیچ میں نہ چھوڑیں کیونکہ مودی حکومت کے ذریعہ اٹھائے گئے اقدامات کی وجہ سے ملک بھر میں ان کے لئے بہت سے مواقع دستیاب ہیں۔