انسداد دراندازی اقدامات پر سرینگر میں اعلیٰ سطحی میٹنگ

سرینگر//
بارڈر سیکورٹی فورس (بی ایس ایف) کے نئے تعینات ہونے والے سربراہ دلجیت سنگھ چودھری اور جموں و کشمیر پولیس کے اعلیٰ افسران نے جموں و کشمیر میں دراندازی کے انسداد کے اقدامات پر بات چیت کیلئے سرینگر میں ایک بیٹھک کا انعقاد کیا۔
بتادیں کہ بی ایس ایف جموں خطے کے سرحد کے۴۰۰کلومیٹر سے زیادہ کی حفاظت کرتا ہے اور اس سال جموں خطے کے کئی حصوں میں ہونے والے حملوں،جن کے نتیجے میں کوئی سیکورٹی اہلکار جاں بحق ہوئے ، کے بعد اس خطے کی سرحدی حفاظت پر خصوصی توجہ مرکوز کی جا رہی ہے ۔ یہ تمام حملے جموں کے ان اضلاع میں ہوئے جو۲۰۲۰تک زیادہ تر ملی ٹنسی سے پاک تھے ۔
جموں کشمیر پولیس کے ایک ترجمان نے بتایا کہ بی ایس ایف کے ڈی جی دلجیت سنگھ چودھری نے جموں وکشمیر پولیس کے ڈائریکٹر جنرل آر آر سوائن اور دیگر اعلیٰ درجے کے پولیس افسروں کے ساتھ بات چیت کی۔انہوں نے کہا کہ اس موقع پر سپیشل ڈی جی جموں و کشمیر پولیس اورڈی جی پی نلین پربھات بھی موجود تھے ۔
ترجمان کا کہنا تھا’’بات چیت کے دوران افسروں نے سرحدوں کے ساتھ اور اندرونی علاقوں میں سیکورٹی کے موجودہ منظر نامے پر توجہ مرکوز کی اور لوگوں کی حفاظت اور سلامتی کو یقینی بنانے کیلئے انسداد دراندازی کے اقدامات پر زور دیا‘‘۔
پولیس ترجمان نے کہا کہ میٹنگ کے دوران افسروں نے انٹلی جنس شیئرنگ کی اہمیت کو اجاگر کیا اور سیکورٹی چلینجوں کا مقابلہ کرنے میں بی ایس ایف اور جموں وکشمیر پولیس کے درمیان تعاون کو بڑھا دیا۔