پہلا مرحلہ:۲۳لاکھ رائے دہندگان ووٹ ڈالنے کے اہل

جموں//
چیف الیکٹورل آفیسر ( سی اِی او) جموںکشمیرپانڈورانگ کے پولے نے آج کہا کہ جموں کشمیر اسمبلی اِنتخابات کے پہلے مرحلے کے دوران۶۶ء۵لاکھ نوجوانوں سمیت ۲۷ء۲۳ لاکھ سے زیادہ رائے دہندگان اپنے اِنتخابی حق رائے دہی کا استعمال کرنے کے اہل ہیںاور جموںوکشمیر کے۷؍اَضلاع کے۲۴؍ اسمبلی حلقوں میں۱۸؍ ستمبر۲۰۲۴ء کو پہلے مرحلے میں ووٹ ڈالے جائیں گے ۔
پولے نے ایک بیان میں کہا کہ دستیاب اِنتخابی فہرستوں کے تازہ ترین اعداد و شمار کے مطابق جموں کشمیر اسمبلی کے پہلے مرحلے میں کل۲۳لاکھ۲۷ہزار۵۴۳ لاکھ رائے دہندگان ووٹ ڈالنے کے اہل ہیں۔ ان میں سے ۱۱لاکھ۷۶ہزار۴۴۱ مرد ‘۱۱لاکھ۵۱ہزار۴۲ خواتین اور ۶۰خواجہ سرا ووٹرز ہیں۔
سی اِی او نے جمہوریت کی مضبوطی میں جموں و کشمیر کے نوجوانوں کے کردار کی اہمیت کو اُجاگر کرتے ہوئے کہا کہ اسمبلی اِنتخابات کے پہلے مرحلے میں۶۶ء۵ لاکھ نوجوان ووٹ ڈالنے کے اہل ہیں۔
ان ۶۶ء۵ لاکھ نوجوان رائے دہندگان کی عمریں ۲۹۔۱۸ برس کے درمیان ہیں اور ان میں۱۹۔۱۸ برس کی عمر کے ایک لاکھ۲۳ہزار۹۲۲پہلی بار رائے دہندگان شامل ہیںجن میں سے۶۵ہزار۵۴۲ مرد اور۵۸ہزار۳۸۰ خواتین ووٹرز ہیں۔
پہلے مرحلے میں۲۸ہزار۳۱۰جسمانی طور خاص افراد اور۸۵ برس سے زائد عمر کے۱۵ہزار۷۷۴ووٹر اپنا حق رائے دہی اِستعمال کریں گے۔
پہلے مرحلے میں جموں و کشمیر صوبوںکے ۲۴؍اسمبلی حلقوں میں ۱۸ ؍ستمبر ۲۰۲۴ ء کو ووٹ ڈالے جائیں گے۔
صوبہ کشمیر میں اننت ناگ، پلوامہ، شوپیاں، کولگام اَضلاع اور صوبہ جموں میں ڈوڈہ، رام بن اور کشتواڑ اَضلاع کے لئے نوٹیفکیشن جاری کیا گیا ہے۔
صوبہ کشمیر میں۱۶؍ اسمبلی حلقے جن میں پانپور، ترال، پلوامہ، راجپورہ، زینہ پورہ، شوپیاں، ڈی ایچ پورہ، کولگام، دیوسر، ڈورو، کوکرناگ (ایس ٹی)، اننت ناگ ویسٹ، اننت ناگ، سری گفوارہ۔بجبہاڑہ، شانگس۔اننت ناگ ایسٹ، پہلگام شامل ہیں۔ صوبہ جموںمیں اسمبلی انتخابات کے پہلے مرحلے میں اندروال، کشتواڑ، پڈر۔ ناگسینی، بھدرواہ، ڈوڈہ، ڈوڈہ ویسٹ، رام بن اوربانہال سمیت ۸؍اَسمبلی حلقوں میں پہلے مرحلے میں ووٹ ڈالے جائیں گے۔
پہلے مرحلے کا نوٹیفکیشن ۲۰؍اگست ۲۰۲۴ ء کو جاری کیا گیا تھا اور پہلے مرحلے کیلئے کاغذاتِ نامزدگی داخل کرنے کی آخری تاریخ ۲۷؍اگست ۲۰۲۴ ء ہے۔