سرینگر//
سالانہ امر ناتھ یاترا کو خوش اسلوبی کے ساتھ پایہ تکمیل تک پہنچانے کی خاطر لکھن پور سے پوترا گھپا تک اضافی پیرا ملٹری فورسز کی کمپنیوں کو تعینات کیا گیا ہے ۔
اطلاعات کے مطابق۲۹جون سے شروع ہونے والی امر ناتھ یاترا کو خوش اسلوبی کے ساتھ پایہ تکمیل تک پہنچانے کی خاطر مرکزی اور یوٹی سطح پر تمام تیاریاں مکمل کی گئی ہیں۔
معلوم ہوا ہے کہ لکھن پور سے پوتر گھپا تک۶۰ہزار پیراملٹری فورسز جن میں سی آ ر پی ایف، آئی ٹی بی پی، بی ایسا یف ، ایس آئی ایف اور سی آئی ایس ایف کی کمپنیاں شامل ہیں کو تعینات کرنے کو ہری جھنڈی دکھائی گئی ہے ۔
ذرائع نے بتایا کہ یاترا روٹوں پر جگہ جگہ شارپ شوٹرس کو تعینات کیا گیا ہے ۔ذرائع کا کہنا ہے کہ یاترا کے دوران پاکستان کے ساتھ لگنے والی سرحدوں پر بھی ہائی الرٹ جاری کیا جائے گا تاکہ امن دشمن عناصر کے منصوبوں کو ناکام بنایا جاسکے ۔
امر ناتھ یاترا کے حوالے سے جموں وکشمیر پولیس نے بھی تیاریاں شروع کیں ہیں اور یاترا کے دوران آفیسران کی تعیناتی کے حوالے سے بھی آرڈر نکالا گیا ہے ۔
ذرائع کے مطابق جموں وکشمیر پولیس نے یاترا روٹوں پر پولیس اہلکاروں کی تعیناتی کے لئے سبھی طرح کے انتظامات مکمل کئے ہیں۔ذرائع نے بتایا کہ بھگوتی نگر سے پوترا گھپا تک یاتریوں کی حفاظت کیلئے خصوصی کمانڈوز کو بھی تعینات کیا جارہا ہے ۔
اس دوران جموںکشمیر کے لیفٹیننٹ گورنر منوج سنہا نے منگل کے روز وسطی کشمیر کے ضلع گاندربل میں امرناتھ یاترا کے بالتل بیس کیمپ کا دورہ کرکے وہاں سیکورٹی انتظامات و دیگر سہولیات کا جائزہ لیا۔
سنہا نے’ایکس‘پر ایک پوسٹ میں کہا’’میں نے آج گاندربل ضلع میں شری امرناتھ جی یاترا کے بالتل بیس کیمپ کا دورہ کیا‘‘۔
ایل جی کا پوسٹ میں مزید کہنا تھا’’یاترا کیلئے حفاظتی انتظامات اور مختلف سہولیات بشمول ادویات، آکسیجن، پانی، خوراک، صفائی ستھرائی او ریاتری کیمپ اور روٹ کے ساتھ ٹیلی کام کنکٹوٹی کا جائزہ لیا‘‘۔
بتادیں کہ۵۲دنوں پر محیط سالانہ امرناتھ یاترا۲۹جون کو شرع ہو کر۱۹؍اگست کو اختتام پذیر ہوگی۔
یاترا حسب روایت۴۸کلو میٹر طویل بنون، پہلگام اور۱۴کلو میٹر طویل بالتل روٹس سے شروع ہوگی۔سال گذشتہ زائد از ساڑھے چار لاکھ یاتریوں نے امر ناتھ یاترا کی تھی۔