سرینگر/۱۳ستمبر
جنوبی کشمیر کے ضلع اننت ناگ کے کوکر ناگ علاقے میں سیکورٹی فورسز اور دہشت گردوں کے درمیان جاری تصادم میں فوجی میجر، ڈی ایس پی سمیت چار اہلکار زخمی ہوئے ہیں۔
معلوم ہوا ہے کہ جنگلی علاقے میں محصوردہشت گردوں کو مار گرانے کی خاطر ہیلی کاپٹروں کی خدمات حاصل کی گئی ہے ۔
کشمیر زون پولیس نے اپنے ٹویٹر ہینڈل پر ٹویٹ کرکے کہا”اننت ناگ کے کوکر ناگ علاقے انکاو¿نٹر شروع ہوا ہے “۔ٹویٹ میں مزید کہا گیا”فوج اور پولیس کے افسر زخمی ہوئے ہیں“۔
دفاعی ذرائع نے بتایا کہ کوکرناگ کے گڈول گاوں میں دہشت گردوں کی موجودگی کی اطلاع موصول ہونے کے بعد سیکورٹی فورسز نے جوں ہی جنگلی علاقے کو محاصرے میں لے کر تلاشی آپریشن شروع کیا تو اسی اثنا میں وہاں پر موجود دہشت گردوںنے فورسز پر اندھا دھند فائرنگ شروع کی۔انہوں نے بتایا کہ سیکورٹی فورسز نے بھی پوزیشن سنبھال کر جوابی کارروائی کا آغاز کیا جس دوران شدید گولیوں کا تبادلہ شروع ہوا۔
دفاعی ذرائع کے مطابق دہشت گردوں کی ابتدائی فائرنگ میں آرمی میجر ، ڈی ایس پی سمیت چار اہلکار زخمی ہوئے جنہیں علاج ومعالجہ کی خاطر فوجی ہسپتال منتقل کیا گیا۔
ذرائع نے بتایا کہ فوجی میجر کی حالت ہسپتال میں نازک بنی ہوئی ہے ۔ معلوم ہوا ہے کہ دہشت گردوں کو مار گرانے کی خاطر ہیلی کاپٹروں کی خدمات حاصل کی گئی ہے ۔
ذرائع نے بتایا کہ علاقے کی اور اضافی کمک کو بھی روانہ کیا گیا تاکہ دہشت گردوں کو فرار ہونے کا کوئی موقع فراہم نہ ہو سکے ۔
آخری اطلاعات موصول ہونے تک علاقے میں شدید گولیوں کا تبادلہ جاری تھا۔اس سلسلے میں مزید تفصیلات کا انتظار ہے ۔
