بجبہاڑہ سڑک حادثے میں نوجوان ہلاک‘ تین دیگر زخمی

سرینگر//
جنوبی ضلع اننت ناگ کے بجبہاڑہ علاقے میں ایک گاڑی درخت کے ساتھ جا ٹکرائی جس کے نتیجے میں اس میں سوار چار افراد زخمی ہوئے جن میں سے بعد میں۱۸سالہ نوجوان ہسپتال میں دم توڑ گیا۔
اطلاعات کے مطابق جی ڈی سی بجبہاڑہ کے نزدیک بدھ کے روز اس وقت سنسنی کا ماحول پھیل گیا جب ایک گاڑی ڈرائیور کے قابو سے باہر ہو کر درخت کے ساتھ جا ٹکرائی جس کے نتیجے میں چار افراد شدید طورپر زخمی ہوئے ۔
معلوم ہوا ہے کہ آس پاس موجود لوگو نے زخمیوں کو طبی امداد کی خاطر نزدیکی ہسپتال منتقل کیا تاہم ڈاکٹروں نے۱۸سالہ عنایت جان ساکن نئی بستی اننت ناگ کو مردہ قرار دیا۔
زخمیوں کی پہچان برہان احمد ولد اعجاز احمد وانی ساکن فرصل ، ابرار احمد وانی ولد نثار احمد ساکن نئی بستی اور سمن ساکن کھنہ بل اننت ناگ کے بطور ہوئی کی گئی ہے ۔
پولیس نے معاملے کی نسبت کیس درج کرکے مزید تحقیقات شروع کی ۔
ادھر جموںکشمیر کے ضلع اودھم پور میں قومی شاہراہ پر یاتریوں سے بھری ایک گاڑی کو حادثہ پیش آیا جس کے نتیجے میں کم سے کم۴یاتریوں سمیت۵؍افراد زخمی ہوگئے ۔
ذرائع نے بتایا کہ اودھم پور کے سمرولی علاقے میں ایک گاڑی ڈرائیور کے قابو سے باہر ہوکر ڈوائیڈر سے ٹکرائی جس کے نتیجے میں۴یاتری اور کار ڈرائیور زخمی ہوگئے ۔انہوں نے کہا کہ اس گاڑی میں اتر پردیش سے تعلق رکھنے والے یاتری سوار تھے جو یاترا کے لئے بالتل بیس کیمپ کی طرف جا رہے تھے ۔
ذرائع نے کہا کہ زخمیوں کو علاج و معالجے کے لئے نزدیکی ہسپتال منتقل کیا گیا جہاں ان کی حالت مستحکم بتائی جا رہی ہے ۔