پائین شہر کے نوجوان کے قتل کا معمہ حل‘تین گرفتار

سرینگر//
سرینگر پولیس نے۱۵مارچ۲۰۲۳کو نوجوان کے قتل کا معمہ حل کرکے میاں بیوی سمیت تین ملزمان کو دھر دبوچ کر سلاخوں کے پیچھے دھکیل دیا۔
پولیس نے ملزمان کی شناخت ساحل مقبول نجار اور اس کی اہلیہ مہک ساحل اور وسیم احمد شیخ ساکنان نارکرہ بڈگام کے بطور کی ہے ۔
پولیس کے ایک ترجمان نے بتایا کہ۱۵مارچ ۲۰۲۳کو سرینگر کے ٹنگن نوگام علا قے میں ایک نوجوان کی لاش پراسرار حالت میں برآمد کی گئی جس کی بعد میں شناخت سہیل رحمان بیگ ولد عبدالرحمن بیگ ساکن قرفلی محلہ سرینگر کے بطور ہوئی ۔
ترجمان نے کہاکہ پولیس نے قانونی اور طبی لوازمات پورے کرنے کے بعد لاش وارثین کے حوالے کی اور اس ضمن میں ایف آئی آر زیر نمبر ۴۸زیر دفعہ ۳۰۲؍آئی پی سی کے تحت نوگام پولیس اسٹیشن میں کیس درج کرکے مزید تحقیقات شروع کی ۔
پولیس ترجمان کے مطابق ایس ایچ او نوگام کی سربراہی میں پولیس نے تحقیقات شروع کی جس دوران ثبوت و شواہد کو اکھٹا کرکے مشتبہ افراد کو حراست میں لیا گیا۔انہوں نے بتایا کہ محمد وسیم شیخ کو پالپورہ سونہ وار میں کرایہ کی رہائش گاہ سے ٹنگن نوگام تک سومو گاڑی میں لاش کو ٹھکانے لگانے میں دیگر دو ملزمان کی مدد کرنے پر گرفتار کیا گیا ہے ۔
ان کے مطابق لاش کو ٹھکانے لگانے کی خاطر جس سومو گاڑی کا استعمال کیا گیا اس کو بھی برآمد کیا گیا ہے ۔
پولیس نے کلیدی ملزمان کی شناخت ساحل مقبول نجار اور اس کی اہلیہ مہک ساحل ساکن نارکرہ بڈگام کے بطور کی ہے ۔انہوں نے کہاکہ مذکورہ ملزمان منشیات فروشی کے دھندے میں بھی ملوث پائے گئے ہیں۔انہوں نے بتایا کہ اس سلسلے میں مزید تحقیقات جاری ہے ۔