جموں کشمیر میں اسمبلی انتخابات کے بارے میں الیکشن کمیشن آف انڈیا فیصلہ لے گا:وزیر داخلہ

سرینگر///(ویب ڈیسک)
وفاقی وزیر داخلہ ‘امیت شاہ نے کہا ہے کہ جموں کشمیر میں اسمبلی انتخابات کے بارے میں الیکشن کمیشن آف انڈیا فیصلہ لے گا ۔
’انڈیا ٹو ڈے کنکلیو‘ میں جموں کشمیر میں اسمبلی الیکشن کے بارے میں پوچھے جانے پرشاہ نے کہا ’’الیکشن کمیشن اس بارے میں فیصلہ کرے گا جب وہ انتخابات کرانے کے لیے تیار ہو جائے گا‘‘۔شاہ نے کہا’’جب الیکشن کمیشن، وزارت داخلہ سے رپورٹ طلب کرے گا، ہم اسے فوری طور پر فراہم کریں گے‘‘۔
یاد رہے کہ رواں ہفتے ہی جموں کشمیر کی سیاسی جماعتوں نے الیکشن کمیشن سے ملاقات میں یو ٹی میں فوری طور پر اسمبلی الیکشن منعقد کرانے کا مطالبہ کیا ۔جموں کشمیر میں آخری بار ۲۰۱۴ میں الیکشن ہو ئے تھے ‘جس کے بعد پی ڈی پی اور بی جے پی کی مخلوط حکومت وجود میں آئی تھی ۔
شاہ نے کہا کہ وزیر اعظم مودی نے جموں کشمیر میں دفعہ ۳۷۰ منسوخ کی جس کے بعد یو ٹی پر تشدد کارروائیوں میں ۷۰ فیصد کمی آئی ہے ۔ان کاکہنا تھا’’ مودی حکومت کے تحت آرٹیکل ۳۷۰ کو ختم کر دیا گیا، رام مندر بن رہا ہے اور تین طلاق سے متعلق مسائل حل ہو گئے‘‘۔
وفاقی وزیر داخلہ کاکہنا تھا ’’ جب پاکستان کے اندر دہشت گردوں کے خلاف سرجیکل اسٹرائیک کی گئی ‘ اس لیے کسی بھی بیرونی طاقت نے ملک کے اندرونی معاملات میں مداخلت کی جرأت نہیں کی‘‘۔
شاہ نے کہا کہ بی جے پی کی قیادت والی این ڈی اے ۲۰۲۴میں دوبارہ حکومت بنائے گی اور نریندر مودی مسلسل تیسری بار وزیر اعظم بنیں گے۔ان کا کہنا تھا’’عوام فیصلہ کریں گے کہ ملک کا اگلا وزیر اعظم کون ہوگا۔ میں نے ملک کے ہر حصے کا دورہ کیا ہے اور محسوس کیا ہے کہ ایک بار پھر بی جے پی حکومت بنائے گی اور مودی مسلسل تیسری بار وزیر اعظم بنیں گے‘‘۔
وفاقی وزیر داخلہ نے کہا کہ۱۹۷۰ کی دہائی کے بعد یہ پہلی بار ہو گا کہ کسی وزیر اعظم کو مسلسل تیسری بار عوام کا مینڈیٹ ملے گا۔
۲۰۲۴کے عام انتخابات میں این ڈی اے کو کتنی سیٹیں ملیں گی‘شاہ نے کہا کہ یہ ۲۰۱۹سے زیادہ ہوں گی۔ ’’ہم (بی جے پی) کو ۳۰۳سے زیادہ سیٹیں ملیں گی۔‘‘
بی جے پی کو۲۰۱۹ کے عام انتخابات میں ۳۰۳ سیٹیں ملی تھیں اور این ڈی اے کو کل۵۴۳ لوک سبھا حلقوں میں سے۳۵۰ سے زیادہ سیٹیں ملی تھیں۔
شاہ نے کہا کہ جب مودی حکومت ۲۰۱۴میں پہلی بار اقتدار میں آئی تو۶۰کروڑ لوگوں کے پاس کوئی بینک کھاتہ نہیں تھا‘۱۰کروڑ لوگوں کے پاس بیت الخلاء تک رسائی نہیں تھی اور تین کروڑ لوگوں کے پاس بجلی کے کنکشن نہیں تھے۔انہوں نے کہا کہ مودی حکومت نے ان سب کو بینکوں، بیت الخلاء‘ مفت کھانا، بجلی اور گیس کنکشن تک رسائی دی ہے۔