سرینگر؍۱۸ستمبر
جموں میں سالگرہ کی ایک تقریب اس وقت خونی انجام کو پہنچ گئی جب کیک چہرے پر لگانے کے تنازع پر ایک شخص نے اپنے دوست پر تیز دھار ہتھیار سے حملہ کرکے اسے ہلاک کردیا۔ پولیس نے جمعہ کے روز یہ اطلاع دی۔
پولیس نے قتل کے سلسلے میں ملزم نیرج عرف ’’انشو‘‘ اور اس کے بھائی ریشو کو گرفتار کرلیا ہے۔
پی ٹی آئی کی رپورٹ کے مطابق یہ واقعہ جمعرات کی رات تقریباً۹بجے لوئر روپ نگر کے قریب پیش آیا۔ گورنمنٹ میڈیکل کالج جموں کی پولیس چوکی نے جانی پور پولیس کو اطلاع دی کہ ایک زخمی شخص، جس کی شناخت پون نائر عرف سمیرکے طور پر ہوئی، کو اس کے دوست جان سوٹرا، گورو سنگھ اور سگند بھٹی گورنمنٹ میڈیکل کالج جموں لائے ہیں۔ ڈاکٹروں نے پون نائر کو اسپتال پہنچنے سے قبل ہی مردہ قرار دے دیا۔
اس کے بعد جانی پور تھانے کی پولیس ٹیم اسپتال پہنچی اور تحقیقات شروع کردی۔
ابتدائی تحقیقات کے مطابق نیرج لوئر روپ نگر کے قریب سڑک کنارے اپنی سالگرہ منارہا تھا، جہاں پون نائر سمیت اس کے دوست بھی موجود تھے۔ اس کا بھائی ریشو بھی اس کے ساتھ تھا۔
کیک کاٹنے کے دوران پون نائر نے مبینہ طور پر نیرج کے چہرے پر کیک لگا دیا، جس کے بعد دونوں کے درمیان زبانی بحث شروع ہوگئی۔ دوستوں نے مداخلت کرکے دونوں کو پُرسکون کردیا، تاہم پولیس کے مطابق نیرج مشتعل ہوگیا اور اپنے پاس موجود ایک کھوکری سے نائر پر حملہ کردیا۔
پولیس ترجمان نے کہا، ’’زخمی کو فوری طور پر جی ایم سی جموں منتقل کیا گیا، جہاں ڈاکٹروں نے اسے مردہ قرار دے دیا۔‘‘پولیس کے مطابق حملے میں پون نائر کی گردن پر گہرا زخم آیا تھا۔
واقعے کے بعد جنی پور پولیس نے قتل کا مقدمہ درج کرکے نیرج اور ریشو کو گرفتار کرلیا۔
پولیس مبینہ طور پر واردات میں استعمال ہونے والا ہتھیار بھی برآمد کرنے کی کوشش کررہی ہے، جبکہ مزید تحقیقات جاری ہیں۔
پی ٹی آئی کے مطابق متوفی کی لاش پوسٹ مارٹم کے لیے جی ایم سی کے مردہ خانے منتقل کردی گئی ہے۔
۔۔۔۔۔۔۔۔(ویب ڈیسک)
