مودی کل ماحولیات اور آب و ہوا پر بین الاقوامی کانفرنس کا افتتاح کریں گے

نئی دہلی، 18 ستمبر (یو این آئی) وزیراعظم نریندر مودی ہفتے کو یہاں وگیان بھون میں ” دی فیوچر آف انوائرنمنٹ اینڈ کلائمٹ ڈائنامکس” کے عنوان سے منعقدہ بین الاقوامی کانفرنس کا افتتاح کریں گے۔
دو روزہ اس کانفرنس کا اہتمام نیشنل گرین ٹریبیونل (این جی ٹی) کی جانب سے کیا جا رہا ہے۔ کانفرنس میں ماحولیاتی ماہرین، سپریم کورٹ، ہائی کورٹس اور ڈسٹرکٹ کورٹس کے جج، مختلف وزارتوں کے سکریٹریز، سینئر سرکاری حکام، ریاستی جوڈیشل اکیڈمیوں کے نمائندے، ریاستی قانونی خدمات کی اتھارٹیوں کے نمائندے، ریاستی ماہرین کی تشخیص کار کمیٹیاں، ریاستی ماحولیاتی اثرات کی تشخیص کار اتھارٹیوں، ریاستی ویٹ لینڈز اتھارٹیوں اور دیگر متعلقہ فریقین کے نمائندے شرکت کریں گے۔
اس میں 17 ملکوں کے ممتاز جج اور عدالتی نمائندے بھی شامل ہوں گے۔ یہ مختلف ملکوں اور خطوں میں اپنائے جا رہے عدالتی طریقوں، سائنسی معلومات، ماحولیاتی انتظام کے طریقۂ کار اور ادارہ جاتی تجربات کو شیئر کرنے کے لیے ایک پلیٹ فارم فراہم کرے گا۔ کانفرنس میں ماحولیات اور آب و ہوا سے جڑے اہم چیلنجوں پر تبادلہ خیال کیا جائے گا۔ ان میں پالیسیاں بنانے، ان پر عمل کرنے اور قوانین کو مؤثر طریقے سے نافذ کرانے میں موجود خامیوں پر بھی غور کیا جائے گا۔
اس کے علاوہ ماحولیات سے جڑے انتظام اور نظام کو مزید مضبوط بنانے اور مختلف اداروں کے درمیان بہتر تعاون بڑھانے کے طریقوں پر بھی بات چیت کی جائے گی۔