ماروتی سوزوکی کی ڈیزائر کی فروخت 35 لاکھ یونٹ سے تجاوز کرگئی

نئی دہلی، 31 اکتوبر (یواین آئی) ماروتی سوزوکی انڈیا کی سیڈان کار ڈیزائر کی فروخت 35 لاکھ یونٹ سے تجاوز کرگئی ہے۔
ملک کی سب سے بڑی کار ساز کمپنی نے ہفتہ کو بتایا کہ اس کے مانیسر پلانٹ میں تیار ہونے والی ڈیزائر نے تقریباً 18 سال اور 9 ماہ میں یہ سنگ میل حاصل کیا ہے۔ اس سے قبل آلٹو، سوئفٹ اور ویگن آر بھی 35 لاکھ گاڑیوں کی فروخت کا ہندسہ عبور کرچکی ہیں۔
ڈیزائر بھارت ایس سی اے پی سے 5 اسٹار سیفٹی ریٹنگ حاصل کرنے والی پہلی سیڈان کار ہے۔ یہ بھارتی بازار میں سب سے زیادہ فروخت ہونے والی مسافر گاڑیوں میں شامل ہے اور گزشتہ مالی سال کے دوران برآمدات کے لحاظ سے بھی پانچ سرفہرست ماڈلز میں جگہ بنانے میں کامیاب رہی۔
ماروتی سوزوکی انڈیا کے منیجنگ ڈائریکٹر اور چیف ایگزیکٹیو آفیسر ہساشی تاکیوچی نے کہاکہ ڈیزائر کی 35 لاکھ گاڑیوں کی مجموعی پیداوار اس ماڈل کے سفر میں ایک اہم سنگ میل ہے۔ سب سے اہم بات یہ ہے کہ یہ چار نسلوں کے دوران لاکھوں صارفین کے اعتماد اور محبت کی عکاسی کرتی ہے۔ کسی کار کا تقریباً دو دہائیوں تک اپنی اہمیت برقرار رکھنا بڑی کامیابی ہے۔ 2008 میں متعارف کرائی گئی ڈیزائر نے اسٹائل، آرام اور افادیت کا بہترین امتزاج پیش کرتے ہوئے ایک مضبوط ورثہ قائم کیا ہے۔
انہوں نے ڈیزائر کے تمام صارفین کا شکریہ ادا کیا اور اس کامیابی میں کمپنی کے ملازمین، سپلائرز اور ڈیلر پارٹنرس کے تعاون کو بھی سراہا۔
نومبر 2024 میں ڈیزائر کی نئی نسل بازار میں متعارف کرائی گئی تھی۔ اس میں پریمیم ٹو ٹون انٹیریئر، جدید خصوصیات اور بہتر ایندھن کی بچت جیسے فیچرز شامل ہیں۔ حال ہی میں اس کا آٹومیٹک ایس-سی این جی ورژن بھی پیش کیا گیا ہے۔
ڈیزائر نے اپریل 2015 میں 10 لاکھ، جون 2019 میں 20 لاکھ اور دسمبر 2024 میں 30 لاکھ یونٹ فروخت کا ہندسہ عبور کیا تھا۔