این ایچ آر سی نے پلول میں مین ہول میں گرنے سے بچی کی موت کا از خود نوٹس لیا

نئی دہلی، 18 ستمبر (یو این آئی) قومی انسانی حقوق کمیشن (این ایچ آر سی) نے ہریانہ کے پلول میں اپنے گھر کے پاس ایک کھلے مین ہول میں گرنے سے چار سال کی بچی کی موت کا از خود نوٹس لیا ہے۔
این ایچ آر سی نے جمعہ کو بتایا کہ کمیشن نے ایک میڈیا رپورٹ کا از خود نوٹس لیا ہے جس کے مطابق 14 ستمبر کو ہریانہ کے پلول میں اپنے گھر کے پاس کھیلتے وقت ایک کھلے مین ہول میں گرنے سے چار سال کی بچی کی موت ہو گئی۔ مبینہ طور پر مقامی لوگوں کی جانب سے متعلقہ حکام سے متعدد شکایتوں کے باوجود مین ہول کھلا رہا۔
کمیشن نے کہا ہے کہ میڈیا رپورٹ کا مواد، اگر سچ ہے، تو یہ انسانی حقوق کی خلاف ورزی کا سنگین معاملہ ہے۔ اس کے پیش نظر کمیشن نے ڈپٹی کمشنر اور سپرنٹنڈنٹ آف پولیس، پلول کو نوٹس جاری کر کے دو ہفتوں کے اندر معاملے پر تفصیلی رپورٹ طلب کی ہے۔ رپورٹ میں جانچ کی صورتحال اور متوفیہ کے لواحقین کو ادا کیا گیا معاوضہ، اگر کوئی ہو، شامل ہونا متوقع ہے۔
قابلِ ذکر ہے کہ 16 ستمبر کی میڈیا رپورٹ کے مطابق، متاثرہ لڑکی کے خاندان اور مقامی لوگوں نے اسے کھلے مین ہول کے اندر پایا اور اسے تشویشناک حالت میں ڈسٹرکٹ سول ہسپتال لے گئے، جہاں ڈاکٹروں نے اسے مردہ قرار دے دیا۔