’۱۵سال بعد رن وے کی مرمت ہو گی ‘اکتوبر میں۱۵روز تک پروازیں معطل رہیں گی‘
ایجنسیز
سرینگر؍۱۳جون
ایئرپورٹس اتھارٹی آف انڈیا نے ہفتہ کے روز کہا کہ سری نگر بین الاقوامی ہوائی اڈے کے رن وے کی مرمت اور دیکھ بھال ناگزیر ہو چکی ہے کیونکہ اس کی آخری بڑی مرمت تقریباً۱۵سال قبل کی گئی تھی۔
سری نگر ہوائی اڈے کے ڈائریکٹر جاوید انجم نے صحافیوں سے گفتگو کرتے ہوئے کہا’’ رن وے کو وقتاً فوقتاً دیکھ بھال کی ضرورت ہوتی ہے۔ یہاں آخری بار رن وے کی مرمت۱۵ سال پہلے کی گئی تھی، جبکہ اس طرح کی مرمت ہر۱۰ سال بعد ضروری ہوتی ہے۔ اسی لیے ہم نے اب رن وے کی بحالی اور دیکھ بھال کا کام شروع کیا ہے‘‘۔
انہوں نے بتایا کہ ایئرپورٹس اتھارٹی آف انڈیا نے رن وے کی مرمت کے لیے جولائی سے ہر ہفتے پیر اور منگل کے روز ہوائی اڈے پر پروازی سرگرمیوں کو محدود رکھنے کا فیصلہ کیا ہے، جبکہ اکتوبر میں حتمی مرحلے کے کام کے لیے۱۵دن تک پروازی آپریشن مکمل طور پر بند رہیں گے۔
جاوید انجم نے کہا}}پیر اور منگل کے دن کام کرنا لازمی ہے کیونکہ محفوظ فضائی آپریشنز کے لیے محفوظ رن وے ضروری ہیں۔ اسی مقصد کے تحت رن وے کی مرمت کی جا رہی ہے۔ پیر اور منگل کو ہم رن وے کے ایک چھوٹے حصے پر کام کریں گے، اس کے بعد پانچ دن تک پروازی آپریشن معمول کے مطابق جاری رہے گا۔ پھر اگلے پیر اور منگل کو رن وے کے دوسرے حصے پر کام کیا جائے گا‘‘۔
انہوں نے مزید کہا کہ اکتوبر میں منصوبے کے آخری مرحلے کا کام مکمل کیا جانا ہے، جس کے باعث رن وے کو مکمل طور پر بند کرنا ناگزیر ہو جائے گا۔’’اکتوبر میں حتمی کام انجام دیا جانا ہے، اس لیے رن وے کی بندش لازمی ہوگی اور اس دوران تقریباً۱۵ روز تک پروازی سرگرمیاں معطل رہیں گی‘‘۔
ڈائریکٹر نے واضح کیا کہ رن وے کی یہ مرمت فضائی سفر کے تحفظ اور ہوائی اڈے کے بنیادی ڈھانچے کو جدید تقاضوں سے ہم آہنگ رکھنے کے لیے کی جا رہی ہے تاکہ مستقبل میں مسافروں کو محفوظ اور بہتر سفری سہولیات فراہم کی جا سکیں۔
واضح رہے کہ وزیر اعلیٰ ‘ عمرعبداللہ نے وزیر دفاع اور شہری ہوا بازی کے وزیت سے ملاقاتوں میں سرینگر ہوائی اڈے کی بندش کا معاملہ اٹھایا تھا ۔ وزیرا علیٰ نے زور دیا تھا کہ اس کا کوئی متبادل حل تلاش کیا جائے کیونکہ بندش کی وجہ سے کشمیر کی سیاحت متاثر ہو سکتی ہے ۔
