جموں؍۲۹؍ اکتوبر
جموں و کشمیر کے ضلع ریاسی میں جمعرات کی صبح ایک ٹیمپو ٹریولر سڑک سے پھسل کر گہری کھائی میں جا گرا، جس کے نتیجے میں۴۵ سالہ خاتون کی موت ہوگئی جبکہ تین دیگر افراد زخمی ہوگئے۔
حکام کے مطابق، حادثہ ضلع ریاسی کے دنسال علاقے میں پیش آیا۔ہلاک شدہ خاتون کی شناخت گلشن کے طور پر کی گئی ہے۔
حادثے میں زخمی ہونے والے تین افراد کی تفصیلات فوری طور پر سامنے نہیں آ سکی ہیں۔
جموں سرینگر قومی شاہراہ پر رام بن ضلع کے ڈلواس علاقے میں جمعرات کو ایک ٹرک اور دو کاروں کے درمیان تصادم کے نتیجے میں چار افراد زخمی ہوگئے۔
ایک مقامی خبر رساں ایجنسی کے مطابق، یہ حادثہ ڈلواس میں ایک پٹرول پمپ کے نزدیک پیش آیا، جہاں اتر پردیش کے رجسٹریشن نمبر والے ایک ٹرک کی جموں سے سرینگر کی طرف آنے والی دو کاروں کے ساتھ ٹکر ہوگئی۔
حکام نے بتایا کہ زخمیوں کو علاج کے لیے ضلع اسپتال رام بن منتقل کیا گیا۔ فوری طور پر زخمیوں کی شناخت ظاہر نہیں کی گئی۔
پولیس نے واقعے کا نوٹس لیتے ہوئے تحقیقات شروع کردی ہے۔
۔۔۔۔۔۔۔۔(ایجنسیاں )
