جاری ترقیاتی اور تحفظاتی منصوبوں اور ملحقہ مندر جئ بحالی کے کام کا جائزہ
ڈی آئی پی آر
جموں؍۸ جون
لیفٹیننٹ گورنر منوج سنہا نے آج مبارک منڈی ہیریٹیج کمپلیکس کا دورہ کیا اور اس تاریخی ورثہ کمپلیکس کے تحفظ، بحالی اور ترقی سے متعلق جاری منصوبوں کی پیش رفت کا جائزہ لیا۔
لیفٹیننٹ گورنر نے مبارک منڈی ہیریٹیج کمپلیکس سے متصل تاریخی گدادھر جی مندر کی متاثرہ دیوار اور سلیب کی بحالی کے جاری کاموں کا معائنہ کیا۔ انہوں نے حکام کو ہدایت دی کہ بحالی کے عمل میں تیزی لائی جائے اور کام کے معیار کو ہر صورت یقینی بنایا جائے۔
جموں میونسپل کارپوریشن کے کمشنر نے لیفٹیننٹ گورنر کو مبارک منڈی ہیریٹیج کمپلیکس میں ریمپ پر مبنی کثیر سطحی پارکنگ سہولت کی تعمیراتی پیش رفت کے بارے میں تفصیلی جانکاری دی۔
بعد ازاں لیفٹیننٹ گورنر نے حال ہی میں قائم کی گئی لائبریری و کیفیٹیریا کا بھی دورہ کیا۔ اس موقع پر مبارک منڈی جموں ہیریٹیج سوسائٹی کی ایگزیکٹو ڈائریکٹر نے مبارک منڈی ہیریٹیج کمپلیکس کی بحالی، مرمت اور تزئین و آرائش سے متعلق باقی ماندہ کاموں کے بارے میں بریفنگ دی۔
سنہا نے بتایا کہ جاری منصوبوں میں دربار ہال کا تحفظ، راجہ رام سنگھ محل کی بحالی، راجہ امر سنگھ محل کے تحفظ اور ڈوگرہ آرٹ میوزیم کی مرمت و بحالی سمیت کئی اہم منصوبے شامل ہیں، جن کی تکمیل آئندہ چند ماہ کے دوران متوقع ہے۔
لیفٹیننٹ گورنر نے متعلقہ افسران کو ہدایت دی کہ تمام منصوبوں کو مقررہ مدت کے اندر مکمل کیا جائے تاکہ مبارک منڈی ہیریٹیج کمپلیکس کو ایک عالمی معیار کے ثقافتی اور تاریخی مرکز کے طور پر مزید فروغ دیا جا سکے۔
اس موقع پر رکن اسمبلی جموں مشرق یودھویر سیتی، چیف سیکرٹری اتل ڈولو، پرنسپل سیکرٹری ثقافت برج موہن شرما، ڈویژنل کمشنر جموں رمیش کمار، آئی جی پی جموں بھیم سین ٹوٹی، کمشنر جموں میونسپل کارپوریشن ڈاکٹر دیوانش یادو، ڈپٹی کمشنر جموں راکیش منہاس، ایس ایس پی جموں جوگیندر سنگھ، ایگزیکٹو ڈائریکٹر مبارک منڈی جموں ہیریٹیج سوسائٹی دیپیکا شرما اور دیگر متعلقہ افسران موجود تھے۔
۔۔۔۔۔۔۔
