(ایجنسیاں)
جموں؍۲۴؍اکتوبر
جموں میں سکیورٹی انتظامات مزید سخت بنانے اور ہنگامی حالات سے نمٹنے کی تیاریوں کا جائزہ لینے کے لیے ہفتے کے روز متعدد کارروائیاں انجام دی گئیں۔
ان کے تحت جموں کی ایک جیل میں تلاشی لی گئی، سانبہ میں بین الاقوامی سرحد کے قریب سرنگ مخالف مشق کی گئی، جبکہ ریلوے اسٹیشن اور سی آر پی ایف کیمپ میں فرضی مشقیں منعقد ہوئیں۔
حکام کے مطابق، صبح تقریباً۱۰بجے ضلع جیل امپھالا میں جیل عملے، سی آر پی ایف اور پولیس نے مشترکہ تلاشی کارروائی انجام دی۔ ایک گھنٹے سے زائد جاری رہنے والی اس کارروائی کے دوران جیل احاطے سے کوئی مشتبہ یا قابل اعتراض مواد برآمد نہیں ہوا۔
ضلع سانبہ میں بارڈر سکیورٹی فورس (بی ایس ایف) نے رام گڑھ سیکٹر میں بین الاقوامی سرحد کے ساتھ واقع سرحدی چوکی لالفامکیما کے اگلے علاقے میں سرنگ مخالف مشق انجام دی۔
حکام کے مطابق، اس مشق کا مقصد سرحد پار سے دراندازی یا اسلحہ، گولہ بارود اور دیگر ممنوعہ اشیا بھارتی علاقے میں پہنچانے کے لیے ممکنہ طور پر بنائی گئی سرنگوں کا پتہ لگانا تھا۔ آخری اطلاعات موصول ہونے تک ایسی کسی سرنگ یا ساخت کا سراغ نہیں ملا تھا۔
دریں اثنا، جموں ریلوے اسٹیشن اور ضلع رام بن کے بانہال علاقے میں واقع سی آر پی ایف کیمپ میں بھی فرضی مشقیں منعقد کی گئیں۔ ان کا مقصد مختلف اداروں کے درمیان تال میل بہتر بنانا اور ہنگامی حالات سے نمٹنے کے لیے تیاریوں کا جائزہ لینا تھا۔
حکام کے مطابق، جموں ریلوے اسٹیشن پر ریلوے پروٹیکشن فورس (آر پی ایف)، فائر اینڈ ایمرجنسی سروسز، طبی عملے اور بم ناکارہ بنانے والے دستے نے مشق میں حصہ لیا۔ سی آئی ڈی کی اسپیشل برانچ اور کاؤنٹر انٹیلی جنس کے اہلکار بھی موجود تھے۔
بانہال کے سی آر پی ایف کیمپ میں مشترکہ سکیورٹی اور ہنگامی ردعمل کی مشق صبح۱۱ بجے شروع ہوئی اور دوپہر۱۲ بج کر۲۰ منٹ پر اختتام پذیر ہوئی۔
اس مشق میں راشٹریہ رائفلز، سی آر پی ایف، ریلوے پروٹیکشن فورس، گورنمنٹ ریلوے پولیس (جی آر پی)، ریاستی ڈیزاسٹر رسپانس فورس (ایس ڈی آر ایف)، پولیس، فائر اینڈ ایمرجنسی سروسز اور بانہال کے بلاک میڈیکل افسر سمیت مختلف اداروں کے اہلکاروں نے حصہ لیا۔
۔۔۔۔۔۔
