کٹھوعہ میں یاتریوں کی حفاظت کیلئےکثیر سطحی سیکورٹی منصوبہ تیار ‘ڈرون کی نگرانی، شاہراہوں پر سخت پہرہ
ویب ڈیسک
جموں؍۸ جون
جموں و کشمیر کے چیف سیکریٹری ‘اتل ڈولو نے پیر کو کہا کہ آئندہ شری امرناتھ یاترا کے لیے وسیع پیمانے پر تیاریاں جاری ہیں اور یاتریوں کو گزشتہ سال کے مقابلے میں بہتر سہولیات اور خدمات فراہم کرنے کے لیے انتظامیہ سرگرم عمل ہے۔
ڈولو نے اعتماد ظاہر کیا کہ۵۷روزہ یاترا کے دوران عقیدت مندوں کو ایک محفوظ، آرام دہ اور خوشگوار سفر کا تجربہ حاصل ہوگا۔ یہ یاترا۳؍جولائی کو جنوبی کشمیر کے ہمالیائی علاقے میں شروع ہوگی اور۲۸؍اگست کو راکھی بندھن کے تہوار کے موقع پر اختتام پذیر ہوگی۔
صحافیوں سے گفتگو کرتے ہوئے چیف سیکریٹری نے کہا کہ یاترا کے آغاز سے قبل تمام انتظامی اور سیکورٹی اقدامات مکمل کر لیے جائیں گے۔ انہوں نے کہا کہ بجلی، پینے کے پانی، رہائش، ٹرانسپورٹ، سیکورٹی اور صحت کی سہولیات سمیت مختلف شعبوں میں تیاریاں جاری ہیں تاکہ یاترا کو بخوبی اور احسن طریقے سے انجام دیا جا سکے۔
ڈولو نے کہا کہ انتظامیہ کی کوشش ہے کہ اس سال یاتریوں کو گزشتہ برس کے مقابلے میں مزید بہتر سہولیات فراہم کی جائیں۔انہوں نے کہا کہ یاتریوں کی حفاظت، سہولت اور آرام کو یقینی بنانے کے لیے جامع انتظامات کیے جا رہے ہیں۔
چیف سیکریٹری نے مزید کہا، ’’میں سب کو یقین دلانا چاہتا ہوں کہ یاتریوں کے لیے مکمل انتظامات دستیاب ہوں گے اور یاترا کے دوران ان کا تجربہ نہایت خوشگوار رہے گا۔‘‘
دریں اثنا آئندہ ماہ شروع ہونے والی سالانہ شری امرناتھ یاترا کے پیش نظر ضلع کٹھوعہ میں یاتریوں کی حفاظت کو یقینی بنانے کے لیے ایک کثیر سطحی سیکورٹی نظام وضع کیا گیا ہے، جس کے تحت ڈرون نگرانی، قومی شاہراہ پر سخت پہرہ اور زمینی سطح پر تلاشی و نگرانی کے اقدامات کو مزید مضبوط بنایا جائے گا۔
اس سلسلے میں پیر کے روز ضلع پولیس لائنز کٹھوعہ میں ایک اعلیٰ سطحی سیکورٹی جائزہ اور رابطہ اجلاس منعقد ہوا، جس کی صدارت سینئر سپرنٹنڈنٹ آف پولیس (ایس ایس پی) کٹھوعہ موہیتا شرما نے کی۔
اجلاس میں پولیس، فوج، بی ایس ایف، سی آر پی ایف اور انٹیلی جنس ایجنسیوں کے افسران نے شرکت کی اور۳ جولائی سے شروع ہونے والی۵۷روزہ امرناتھ یاترا کے دوران فول پروف سیکورٹی انتظامات کو یقینی بنانے کے لیے مشترکہ حکمت عملی کو حتمی شکل دی گئی۔
ایس ایس پی موہیتا شرما نے افسران کو ہدایت دی کہ یاترا کے دوران مکمل چوکسی اختیار کی جائے اور کسی بھی قسم کی غفلت یا لاپرواہی کی کوئی گنجائش نہ چھوڑی جائے۔
اجلاس میں یاترا کی سیکورٹی حکمت عملی پر ایک جامع پریزنٹیشن پیش کی گئی جس میں نگرانی کے نظام، یاتری قافلوں کے انتظام، کوئیک ریسپانس ٹیموں کی تعیناتی اور ہنگامی ردِعمل کی تیاریوں کا جائزہ لیا گیا۔
ایس ایس پی نے ہدایت دی کہ لنگروں، قیام گاہوں اور یاترا سے وابستہ دیگر مقامات کا باقاعدہ معائنہ کیا جائے اور مشکوک سرگرمیوں یا ملک دشمن عناصر پر کڑی نظر رکھی جائے۔انہوں نے افسران کو انٹیلی جنس معلومات جمع کرنے کے عمل کو مزید مؤثر بنانے، قابلِ عمل اطلاعات کا فوری تبادلہ کرنے اور مختلف خفیہ ایجنسیوں کے ساتھ مسلسل رابطہ رکھنے کی بھی ہدایت دی تاکہ ایک مضبوط اور فعال سیکورٹی گرڈ قائم رکھا جا سکے۔
اجلاس میں سرحدی قومی شاہراہ اور ریلوے ٹریک کی سیکورٹی پر خصوصی توجہ دی گئی۔ اس ضمن میں چوبیس گھنٹے نگرانی، چیک پوائنٹس کے قیام اور علاقے میں مسلسل گشت کو یقینی بنانے کی ہدایات جاری کی گئیں۔
قومی شاہراہ کے اطراف، ہوٹلوں، ڈھابوں اور صنعتی اداروں میں کام کرنے والے مزدوروں کے مردم شماری اور کرایہ داروں کی تصدیقی مہم مکمل کرنے پر بھی زور دیا گیا تاکہ یاترا کے راستے کے آس پاس کسی مشتبہ یا ملک دشمن عنصر کی موجودگی کو خارج از امکان بنایا جا سکے۔
موہیتا شرما نے نگرانی اور فوری ردِعمل کی صلاحیتوں کو مزید مضبوط بنانے کے لیے ڈرون نگرانی میں اضافہ، ایکسرے مشینوں کی تنصیب اور اہم مقامات بشمول لکھن پور بیس کیمپ اور دیگر یاترا مقامات پر اینٹی سبوٹاج چیکنگ کے لیے ڈاگ اسکواڈز کی تعیناتی کی ہدایت دی۔
انہوں نے پولیس، مرکزی مسلح پولیس فورسز‘ سول انتظامیہ، ٹریفک پولیس، محکمہ صحت اور دیگر متعلقہ اداروں کے درمیان مؤثر رابطے اور معلومات کے فوری تبادلے کی ضرورت پر بھی زور دیا تاکہ کسی بھی ہنگامی صورتحال میں بروقت اور مؤثر ردِعمل ممکن بنایا جا سکے۔
اجلاس میں افسران کو یاترا کے چھوٹے قافلوں (منی کنوائز) کی مؤثر نگرانی اور سیکورٹی کو یقینی بنانے کی ہدایت دی گئی، جبکہ تمام اہم یاترا مقامات پر سی سی ٹی وی نگرانی کے دائرہ کار کو مزید وسیع کرتے ہوئے چوبیس گھنٹے مانیٹرنگ کا نظام قائم کرنے پر بھی زور دیا گیا۔
ایس ایس پی کٹھوعہ نے کہا کہ اعلیٰ سطح کی آپریشنل تیاری، باہمی ہم آہنگی اور مربوط کوششوں کے ذریعے امرناتھ یاترا کے محفوظ، پُرامن اور کامیاب انعقاد کو یقینی بنایا جائے گا۔
۔۔۔۔۔۔۔۔
