سوپور میں ۶۶لاکھ روپے سے زائد مالیت کی جائیدادیں ضبط کیں:پولیس
سرینگر؍۸ جون
سرینگر پولیس نے منشیات کے خلاف جاری مہم کے تحت دو منشیات فروشوں کی تقریباً۴کروڑ روپے مالیت کی غیر منقولہ جائیدادیں ضبط کر لی ہیں۔
پولیس کے ایک ترجمان نے بتایا کہ منشیات اور نفسیاتی اثرات رکھنے والے مادّوں کے قانون (این ڈی پی ایس ایکٹ)‘۱۹۸۵کی متعلقہ دفعات کے تحت یہ کارروائی عمل میں لائی گئی۔
ترجمان کے مطابق سنگم پولیس نے غلام احمد ڈار کی تقریباً ۳روڑ روپے مالیت کی جائیداد ضبط کی، جس میں ایک رہائشی مکان، اراضی اور تجارتی دکانیں شامل ہیں۔انہوں نے کہا کہ تحقیقات کے دوران یہ ثابت ہوا کہ مذکورہ جائیدادیں منشیات کی غیر قانونی تجارت سے حاصل ہونے والی آمدنی سے خریدی گئی تھیں۔
ایک اور کارروائی میں نوہٹہ پولیس نے محمد شفیع شیخ کی تقریباً ایک کروڑ روپے مالیت کی رہائشی جائیداد ضبط کی۔پولیس کے مطابق یہ جائیداد بھی منشیات کی اسمگلنگ سے حاصل شدہ غیر قانونی آمدنی سے بنائی گئی تھی۔
ترجمان نے مزید کہا کہ یہ کارروائی این ڈی پی ایس ایکٹ کی متعلقہ دفعات کے تحت اس مقصد کے لیے کی گئی تاکہ منشیات کی غیر قانونی تجارت سے حاصل شدہ اثاثوں کو چھپانے، منتقل کرنے یا فروخت کرنے سے روکا جا سکے۔
اس دوران نشہ مکت جموں و کشمیر ابھیان کے تحت جاری۱۰۰روزہ مہم کے دوران جموں و کشمیر پولیس نے پیر کے روز سوپور میں دو بدنام زمانہ منشیات فروشوں کی۶۶لاکھ روپے سے زائد مالیت کی غیر قانونی جائیدادیں این ڈی پی ایس ایکٹ۱۹۸۵کے تحت ضبط کر لیں۔
پولیس کے مطابق ضبط شدہ جائیدادیں ظہور احمد شاہ ولد غلام محمد شاہ ساکن حنفیہ کالونی، آرام پورہ سوپور اور منظور احمد بابا ولد ثناء اللہ بابا ساکن مگری پورہ سوپور کی ملکیت ہیں، جو منشیات سے متعلق مختلف مقدمات میں ملوث ہیں۔
پولیس نے بتایا کہ این ڈی پی ایس ایکٹ کے تحت کی گئی مالیاتی تحقیقات کے دوران ان افراد کے ایسے اثاثوں کی نشاندہی کی گئی جو مبینہ طور پر منشیات کی غیر قانونی تجارت سے حاصل شدہ رقم سے خریدے گئے تھے۔ تحقیقات میں یہ بھی سامنے آیا کہ یہ جائیدادیں ان کی معلوم آمدنی کے ذرائع سے کہیں زیادہ ہیں۔
این ڈی پی ایس ایکٹ کی دفعہ۶۸؍ایف کے تحت ضبطی اور منجمد کرنے کے احکامات جاری کیے گئے ہیں جبکہ متعلقہ مجاز اتھارٹی کے سامنے ضبطی کی کارروائی زیر عمل ہے۔
ظہور احمد شاہ کی ضبط شدہ جائیدادوں میں حنفیہ کالونی آرام پورہ میں واقع رہائشی مکان، غسل خانہ‘۱۳مرلہ باڑہ بند اراضی اور ر ایک اسکوٹی شامل ہے، جن کی مجموعی مالیت۴۰لاکھ۸۲ہزار۷۱۷روپے بتائی گئی ہے۔
اسی طرح منظور احمد بابا کی مگری پورہ میں واقع رہائشی عمارت اور ہتھ لنگو میں ایک کنال چھ مرلہ اراضی، بنیاد (پلنتھ) اور تعمیراتی سامان پر مشتمل جائیداد ضبط کی گئی، جس کی مالیت۲۵لاکھ۷۳ہزار۵۶۷ روپے ہے۔
پولیس کے مطابق تمام قانونی تقاضے پورے کرنے کے بعد آزاد گواہوں کی موجودگی میں ملزمان کو ضبطی کے نوٹس بھی فراہم کیے گئے۔
پولیس نے کہا کہ یہ کارروائی منشیات کی اسمگلنگ کے مالیاتی ڈھانچے کو نشانہ بنانے اور ضلع میں سرگرم منشیات کے نیٹ ورک کو ختم کرنے کی حکمت عملی کا حصہ ہے۔ مزید کئی منشیات فروشوں کی جائیدادوں کی نشاندہی بھی کی جا چکی ہے اور ان کے خلاف مزید کارروائیاں جاری ہیں۔
