ایجنسیز
جموں؍۲۴مارچ
ڈپٹی انسپکٹر جنرل آف پولیس (ڈی آئی جی) جموں،سانبہ،کٹھوعہ رینج، شیو کمار شرما نے منگل کے روز جموں و کشمیر کے ضلع کٹھوعہ کے سرحدی علاقوں کا تفصیلی دورہ کر کے سکیورٹی صورتحال اور پولیس فورسز کی آپریشنل تیاریوں کا جائزہ لیا۔
حکام کے مطابق ڈی آئی جی نے سینئر سپرنٹنڈنٹ آف پولیس کٹھوعہ موہیتا شرما، ایس پی آپریشنز کانڈی و بارڈر مکوند اور دیگر افسران کے ہمراہ حساس علاقوں کا دورہ کیا۔
دورے کے دوران شیو کمار شرما نے سکیورٹی کا تفصیلی جائزہ لیا اور حساس مقامات پر تعینات پولیس اہلکاروں اور ولیج ڈیفنس گارڈ (وی ڈی جی) ارکان سے بات چیت کی۔
انہوں نے افسران اور اہلکاروں کو ہدایت دی کہ سرحد کے قریب ناکہ پوائنٹس اور دیگر حساس مقامات پر ڈیوٹی کے دوران چوکس رہیں اور پیشہ ورانہ صلاحیت کا مظاہرہ کریں۔
ڈی آئی جی نے تعینات فورس کو ان کی ذمہ داریوں کی اہمیت سے آگاہ کرتے ہوئے انہیں مزید مستعد رہنے کی تاکید کی۔انہوں نے تمام افسران کو ہدایت دی کہ وہ بالخصوص رات کے اوقات میں ناکہ چیکنگ کو مزید مضبوط بنائیں اور سرحدی علاقوں میں سرگرم سماج دشمن اور ملک دشمن عناصر کے خلاف نگرانی کو تیز کریں۔
سرحدی نظم و نسق کو مؤثر بنانے کے لیے ڈی آئی جی نے بارڈر سکیورٹی فورس کے اعلیٰ افسران سے بھی ملاقات کی، جس میں باہمی تال میل کو فروغ دینے اور سکیورٹی سے متعلق مختلف امور پر تبادلہ خیال کیا گیا۔انہوں نے آپریشنل کارکردگی بہتر بنانے کے لیے مشترکہ ناکے قائم کرنے کی بھی ہدایت دی۔
دورے کے دوران شیو کمار شرما نے جاری اور آنے والے تہواروں کے پیش نظر سکیورٹی اہلکاروں میں مٹھائیاں بھی تقسیم کیں تاکہ جوانوں کے حوصلے بلند کیے جا سکیں۔
