جموں؍۱۸مارچ
جموں کشمیر کے اضلاع راجوری، ڈوڈہ اور پونچھ میں مشتبہ دہشت گردوں کی نقل و حرکت کی اطلاعات کے بعد سیکورٹی فورسز نے مختلف مقامات پر تلاشی کارروائیاں شروع کر دی ہیں، حکام نے بدھ کو بتایا۔
حکام کے مطابق راجوری کے علاقے کھنڈلی اور اس سے ملحقہ پالما کے نزدیک علاقوں میں منگل کی دیر رات اُس وقت کومبنگ آپریشن شروع کیا گیا جب ایک مقامی شخص نے دو مشتبہ افراد کی نقل و حرکت کی اطلاع دی۔
انہوں نے بتایا کہ مشتبہ افراد کو ایک نالے کے راستے قریبی جنگل کی طرف جاتے ہوئے دیکھا گیا۔
ایک عہدیدار کے مطابق اب تک ان مشتبہ افراد کے ساتھ کوئی رابطہ نہیں ہو سکا ہے۔
ادھر ڈوڈہ کے مرمت علاقے کے کئی دیہات میں بھی اسی نوعیت کی کارروائیاں جاری ہیں، جہاں مقامی لوگوں نے مشتبہ دہشت گردوں کی نقل و حرکت کی اطلاع دی ہے۔
مرمت کا علاقہ ڈوڈہ اور ادھم پور کے بسانت گڑھ کے درمیان دہشت گردوں کی آمد و رفت کے لیے استعمال ہوتا رہا ہے، جو رام بن ضلع کے کچھ حصوں سے بھی متصل ہے۔
حکام نے بتایا کہ پولیس اور فوج نے ڈوڈہ کے سرلیا علاقے کے علاوہ پونچھ ضلع کے ڈنڈی دھارا اور آری سروتی علاقوں میں بھی تلاشی کارروائیاں انجام دیں۔(ایجنسیاں)
