جموں؍۱۸مارچ
رائزنگ اسٹار کور کے جنرل آفیسر کمانڈنگ (جی او سی) لیفٹیننٹ جنرل راجن شراوت نے بدھ کے روز جموں و کشمیر کے ضلع کٹھوعہ کے مچھیڈی سیکٹر میں تعینات فوجی دستوں کی آپریشنل تیاریوں کا جائزہ لیا۔
کٹھوعہ ضلع کا بنی،مچھیڈی پہاڑی علاقہ گزشتہ دو برسوں کے دوران کئی حملوں اور جھڑپوں کا گواہ رہا ہے۔ اسے بین الاقوامی سرحد (آئی بی) سے ڈوڈہ، کشتواڑ اور ادھم پور اضلاع کی جانب دراندازی کے ایک اہم راستے کے طور پر دیکھا جاتا ہے۔
دفاعی ترجمان، جموں نے سوشل میڈیا پلیٹ فارم ’ایکس‘ پر جاری بیان میں کہا ’’جی او سی رائزنگ اسٹار کور نے بنی-مچھیڈی سیکٹر (ضلع کٹھوعہ) میں فوجی دستوں کی آپریشنل تیاریوں کا جائزہ لیا‘‘۔
اس موقع پر جی او سی نے جوانوں کی جنگی تیاری، بلند حوصلے اور ہر طرح کے حالات میں مشن کی کامیابی کے لیے ان کے عزم کو سراہا۔
دراندازی کو روکنے کے لیے فوج نے گزشتہ سال بنی،مچھیڈی کے بلند پہاڑی علاقوں میں متعدد کمپنیاں تعینات کی تھیں۔
