ویب ڈیسک
جموں؍۱۸مارچ
جموں و کشمیر کے محکمہ خزانہ نے مالی سال۲۰۲۵۔۲۶کے اختتام سے قبل ٹریجری آپریشنز کے لیے سخت اصول اور واضح ڈیڈ لائنز مقرر کرتے ہوئے تمام متعلقہ افسران کو ہدایات جاری کی ہیں تاکہ مالی سال کی بروقت اور ہموار تکمیل یقینی بنائی جا سکے۔
محکمہ کی جانب سے جاری سرکلر کے مطابق تمام ڈرائنگ اینڈ ڈسبرسنگ آفیسرز (ڈی ڈی اوز) کو ہدایت دی گئی ہے کہ وہ بل جمع کرانے کی مقررہ آخری تاریخ کی سختی سے پابندی کریں اور اس بات کو یقینی بنائیں کہ تمام تجاویز مکمل اور درست ہوں۔
سرکلر میں واضح کیا گیا ہے کہ کسی بھی بل کے مسترد ہونے کی صورت میں، اگر اس میں غلطی یا نامکمل معلومات پائی گئی، تو اس کی مکمل ذمہ داری متعلقہ افسر پر عائد ہوگی۔
محکمہ نے خزانے میں بلوں کی ہارڈ کاپی جمع کرانے کے لیے اختتامی دنوں میں شام۴ بجے تک کی ڈیڈ لائن مقرر کی ہے۔
اسی طرح ٹریژری افسران کو ہدایت دی گئی ہے کہ وہ اپنی اپنی ڈائریکٹوریٹس کو واجبات (لائیبلٹی) کی رپورٹس شام۵ بجے تک ارسال کریں، جس کے بعد انہیں یکجا کر کے ڈائریکٹوریٹ جنرل اکاؤنٹس اینڈ ٹریژریز کو شام۶بجے تک بھیجا جائے گا۔
محکمہ خزانہ کے ان اقدامات کا مقصد مالی نظم و ضبط کو برقرار رکھنا اور مالی سال کے اختتام پر کسی بھی قسم کی بے ضابطگی یا تاخیر سے بچنا ہے۔
