ویب ڈیسک
سرینگر؍۱۱مارچ
جموں و کشمیر انتظامیہ نے بدھ کے روز کہا ہے کہ وادی میں ایندھن، بشمول ایل پی جی، کا مناسب ذخیرہ موجود ہے اور عوام کو گھبرانے کی کوئی ضرورت نہیں۔
کشمیر کے ڈویژنل کمشنر انشُل گرگ نے صحافیوں کو بتایا کہ ہائی اسپیڈ ڈیزل، موٹر اسپرٹ اور ایل پی جی سمیت ضروری ایندھن کے ذخائر اطمینان بخش ہیں۔
گرگ نے کہا’’ایل پی جی کا ذخیرہ اس وقت تقریباً۱۳دن کے لیے موجود ہے جبکہ معمول کے حالات میں بھی ہم۱۵سے۲۰دن تک کی سپلائی برقرار رکھتے ہیں‘‘۔
صوبائی کمشنر نے کہا کہ حکومت تمام تینوں ایندھن کے ذخائر کی مسلسل نگرانی کر رہی ہے اور اس حوالے سے عوام کو فکر مند ہونے کی ضرورت نہیں۔
گرگ نے کہا’’ہمارا کنٹرول روم اور محکمہ خوراک، شہری رسد و امور صارفین روزانہ کی بنیاد پر صورتحال کی نگرانی کر رہے ہیں اور ذخائر کے لحاظ سے ہم کافی مستحکم پوزیشن میں ہیں‘‘۔
ڈویژنل کمشنر نے کہا کہ جموںسرینگر قومی شاہراہ پر معمولی خلل کے باوجود ایندھن کی سپلائی متاثر نہیں ہوئی ہے۔انہوں نے عوام سے اپیل کی کہ وہ صرف سرکاری معلومات پر بھروسہ کریں اور گھبراہٹ میں آ کر خریداری نہ کریں۔
گرگ نے کہا کہ حکومت ہند اور جموں و کشمیر حکومت صورتحال پر گہری نظر رکھے ہوئے ہیں اور اگر کسی فیصلے کی ضرورت پڑی تو اسے بروقت عوام تک پہنچایا جائے گا۔
صوبائی کمشنر نے مزید بتایا کہ مرکز کی جانب سے کمرشل ایل پی جی پر کچھ پابندیاں عائد کی گئی ہیں، تاہم یہ پابندیاں گھریلو صارفین، اسپتالوں اور تعلیمی اداروں پر لاگو نہیں ہوں گی۔
گرگ نے کہا کہ اگر کہیں بھی اس حوالے سے خلاف ورزی سامنے آتی ہے تو متعلقہ ڈپٹی کمشنرز فوری کارروائی کریں گے تاکہ عوام کو ضروری خدمات کے حصول میں کسی قسم کی دشواری کا سامنا نہ کرنا پڑے۔
