۷۶۵۰سرکاری اسامیاں پُر کی گئیں، جبکہ مزید۲۳۸۰۰ اسامیوں کے لیے بھرتی کا عمل جاری ہے:ایل جی سنہا
جموں: جموں و کشمیر کے لیفٹیننٹ گورنر منوج سنہا نے پیر کو کہا کہ یونین ٹیریٹری میں عوامی طرزِ حکمرانی کی جانب منتقلی نے جمہوری اداروں پر عوام کے اعتماد کو مضبوط کیا ہے اور شراکتی حکمرانی کو بحال کیا ہے۔
اسمبلی کا۲۷روزہ اجلاس، جو تین ماہ کے عرصے میں دوہری نشستوں کے ساتھ منعقد ہوا، سنہا کے خطاب سے شروع ہوا۔
سنہا نے کہا کہ حکومت پوری توانائی اور عزم کے ساتھ بے روزگاری کے مسئلے سے نمٹنے، بنیادی ڈھانچے کے خلا کو پُر کرنے اور سماجی فلاحی اقدامات کو وسعت دینے پر توجہ مرکوز رکھے ہوئے ہے۔
ایل جی نے کہا’’حکومت نے اپنے پہلے سال میں ترقی کو وقار کے ساتھ، ترقی کو سماجی انصاف کے ساتھ اور پیش رفت کو امن کے ساتھ جوڑنے کی کوشش کی ہے۔ شمولیاتی حکمرانی کے وژن کی رہنمائی میں، حکومت بے روزگاری، بنیادی ڈھانچے کے خلا اور سماجی بہبود جیسے چیلنجوں سے نمٹنے کے لیے پوری توانائی اور عزم کے ساتھ پُرعزم ہے‘‘۔
سنہا نے کہا کہ حکومت نے عام شہریوں سے متعلق مسائل‘بشمول سرکاری ملازمین، یومیہ اجرت پر کام کرنے والوں، کنٹریکٹ ورکرز اور پسماندہ طبقات‘سے نمٹنے کے لیے ایک انسانی اور ہمدردانہ رویہ اپنایا ہے، اور ان سے متعلق فیصلوں کا ہمدردی کے ساتھ جائزہ لیا گیا ہے، جہاں ضرورت پڑی اصلاحی اقدامات شروع کیے گئے ہیں۔
انہوں نے کہا کہ اچھی حکمرانی بدستور حکومت کی ترقیاتی حکمتِ عملی کا سنگِ بنیاد ہے، اور شفافیت، جوابدہی اور شہری مرکز خدمات کی فراہمی میں مسلسل اصلاحات نے عوامی اعتماد اور ادارہ جاتی کارکردگی کو مضبوط کیا ہے۔
لیفٹیننٹ گورنر نے کہا ’’۱۵۰۰سے زائد عوامی خدمات آن لائن دستیاب کر دی گئی ہیں اور۳۹۱خدمات کو آٹو اپیل سسٹم کے ساتھ مربوط کیا گیا ہے تاکہ بروقت فراہمی یقینی بنائی جا سکے‘‘۔
کئی برسوں کے وقفے کے بعد منتخب حکومت کی تشکیل کو ایک اہم سنگِ میل قرار دیتے ہوئے سنہا نے کہا کہ عوامی حکمرانی کی جانب منتقلی نے جمہوری اداروں پر عوام کے اعتماد کو مضبوط کیا ہے اور شراکتی حکمرانی کو بحال کیا ہے۔
ایل جی نے کہا’’حکومت مقامی اداروں کے انتخابات بروقت کرانے اور شفافیت و جوابدہی بڑھانے کے لیے ڈیجیٹل حکمرانی کے مزید انضمام کے لیے پُرعزم ہے‘‘۔
لیفٹیننٹ گورنر نے کہا کہ روزگار کی تخلیق اور نوجوانوں کو بااختیار بنانا حکومت کے ترقیاتی وژن کے مرکزی نکات ہیں۔ان کاکہناتھا’’۲۰۲۵میں شفاف اور میرٹ پر مبنی بھرتی کے ذریعے۷۶۵۰سرکاری اسامیاں پُر کی گئیں، جبکہ مزید۲۳۸۰۰ اسامیوں کے لیے بھرتی کا عمل جاری ہے۔ اس کے علاوہ،۹۱۰ہمدردانہ تقرریاں کی گئیں، جن میں دہشت گردی سے متاثرہ خاندانوں کے۴۶۴قریبی رشتہ دار شامل ہیں‘‘۔
مشن یووا کا ذکر کرتے ہوئے سنہا نے کہا کہ اس اقدام کا مقصد 1.35 لاکھ کاروباری یونٹس قائم کرنا اور 4.5 لاکھ نوجوانوں کیلئے روزگار کے مواقع پیدا کرنا ہے۔
لیفٹیننٹ گورنر نے بتایا کہ اس پروگرام کے تحت 1.51 لاکھ سے زائد نوجوانوں نے رجسٹریشن کرائی ہے،۶۱لاکھ۹۰۰سے زائد نے کریڈٹ سے منسلک اسکیموں کے تحت درخواستیں دی ہیں اور۱۲ہزارسے زائد کیسز منظور کیے جا چکے ہیں، جن میں۸۰۰کروڑ روپے سے زائد کے قرضے شامل ہیں۔
سنہا نے کہا کہ سماجی بہبود حکومت کی اہم ترجیح ہے۔ قومی غذائی تحفظ قانون کے تحت۲۵لاکھ خاندانوں کو راشن کی سہولت فراہم کی جا رہی ہے، جبکہ پردھان منتری غریب کلیان اَنّ یوجنا کے تحت 16.62 لاکھ خاندانوں کو مفت راشن مل رہا ہے۔
ایل جی نے کہا کہ سماجی تحفظ اسکیموں کے تحت۱۰لاکھ سے زائد مستحقین کو مالی امداد دی جا رہی ہے، اور عمر کے لحاظ سے ماہانہ پنشن میں اضافہ کر کے۱۲۵۰سے۲۰۰۰روپے تک کیا گیا ہے۔انہوں نے مزید کہا کہ میرج اسسٹنس اسکیم کے تحت اہلیت کی شرائط کو معقول بنا کر اس کے دائرۂ کار کو وسعت دی گئی ہے۔
شہری ترقی کے حوالے سے ایل جی نے کہا کہ اسمارٹ سٹی مشن کے تحت۲۷۷منصوبے مکمل ہو چکے ہیں، جبکہ امرت۔II کے تحت۹۰منصوبوں کی منظوری دی گئی ہے جن کی لاگت ایک ہزار کروڑ روپے سے زائد ہے، اور ان کا مقصد صفائی، پانی کی فراہمی اور آبی ذخائر کی بحالی ہے۔
سنہا نے کہا کہ رہائش اور بازآبادکاری ترجیحی شعبے ہیں۔ پردھان منتری آواس یوجنا (دیہی) کے تحت 3.21 لاکھ مکانات تعمیر کیے جا چکے ہیں اور بے زمین مستحقین کو زمین فراہم کی جا رہی ہے۔ قدرتی آفات کے باعث رہائشی زمین سے محروم ہونے والے خاندانوں کو پانچ مرلہ زمین بھی دی جا رہی ہے۔
صنعتی ترقی پر روشنی ڈالتے ہوئے انہوں نے کہا کہ۲۰۲۰سے اب تک۲۲۲۷صنعتی یونٹس نے۱۵ہزار۹۴۰کروڑ روپے کی سرمایہ کاری کے ساتھ پیداوار شروع کی ہے، جس سے۷۳ہزار۸۰۰ سے زائد افراد کو روزگار ملا ہے۔ مزید۱۰۲۸یونٹس، جن کی مجوزہ سرمایہ کاری۲۷ہزار۶۱۳کروڑ روپے ہے، عمل درآمد کے مرحلے میں ہیں۔
لیفٹیننٹ گورنر نے بتایا کہ اسٹارٹ اپ انڈیا کے تحت۱۳۱۶اسٹارٹ اپس رجسٹرڈ ہوئے ہیں، جن میں۴۷۱خواتین کی قیادت میں قائم ادارے شامل ہیں، جبکہ پردھان منتری روزگار تخلیق پروگرام کے تحت۶۰۵۰خود روزگار ادارے قائم کیے گئے ہیں۔
ایل جی نے کہا کہ ہینڈلوم اور ہینڈی کرافٹس کا شعبہ تقریباً 4.45 لاکھ افراد کو روزگار فراہم کر رہا ہے‘۱۸دستکاری مصنوعات کو جغرافیائی شناخت (جی آئی) ٹیگ مل چکا ہے اور مزید۱۷؍اندراج کے مرحلے میں ہیں۔انہوں نے کہا کہ بزنس ریفارم ایکشن پلان کے تحت جموں و کشمیر نے قومی سطح پر پانچواں مقام حاصل کیا ہے۔
زراعت اور اس سے منسلک شعبوں میں پیش رفت کا ذکر کرتے ہوئے انہوں نے کہا کہ دودھ کی پیداوار 28.75 لاکھ میٹرک ٹن تک پہنچ گئی ہے، جبکہ مٹن اور اون کی پیداوار میں بھی نمایاں اضافہ ہوا ہے۔ فصلوں میں تنوع، بیجوں کے نظام کی مضبوطی، تیل دار اجناس کی کاشت میں توسیع اور شہد کی پیداوار نے کسانوں کی آمدنی میں اضافہ کیا ہے۔
آخر میں، اجتماعی کوششوں پر زور دیتے ہوئے ایل جی نے ایوان کے اراکین سے اپیل کی کہ وہ تعاون اور مشترکہ ذمہ داری کے جذبے کے ساتھ کام کریں تاکہ ایک پُرامن، ترقی یافتہ اور خوشحال جموں و کشمیر کی تعمیر ہو سکے، جہاں ہر شہری کو وقار، مواقع اور امید میسر ہوں۔
