جی ڈی سی ڈوڈہ میں طالب علم کی مبینہ خودکشی کی تحقیقات‘ اسسٹنٹ پروفیسر معطل

ڈوڈہ: جموں کشمیر محکمہ اعلیٰ تعلیم نے۱۶ جنوری ۲۰۲۵کو گورنمنٹ ڈگری کالج ڈوڈہ میں ایک طالب علم کی مبینہ خودکشی کے واقعے کی تحقیقات کے لیے ایک کمیٹی تشکیل دے دی ہے، یہ بات ایک سرکاری حکم میں کہی گئی ہے۔
حکم نامے میں کہا گیا ہے’’اس کے ذریعے حکم دیا جاتا ہے کہ محکمہ اعلیٰ تعلیم کے درج ذیل افسران پر مشتمل ایک کمیٹی تشکیل دی جاتی ہے جو۱۶ جنوری ۲۰۲۵کو گورنمنٹ ڈگری کالج، ڈوڈہ میں ایک طالب علم کی جانب سے مبینہ طور پر کی گئی خودکشی کے واقعے کی تحقیقات کرے گی‘‘۔
حکم کے مطابق کمیٹی کے اراکین میں ڈاکٹر شیخ اعجاز بشیر، ڈائریکٹر کالجز، محکمہ اعلیٰ تعلیم؛ شری سنجے کمار ٹکو ، ڈپٹی سیکریٹری حکومت، محکمہ اعلیٰ تعلیم؛ اور سید اشرت پرویز، انڈر سیکریٹری حکومت، محکمہ اعلیٰ تعلیم شامل ہیں۔
ایک علیحدہ سرکاری حکم کے مطابق، تحقیقات مکمل ہونے تک ایک اسسٹنٹ پروفیسر کو بھی معطل کر دیا گیا ہے۔
حکم نامے میں کہا گیا ہے’’معاملے کی زیرِ التوا تحقیقات کے پیش نظر، مجاز اتھارٹی نے حکم دیا ہے کہ پروفیسر منظور احمد، اسسٹنٹ پروفیسر (کامرس)، گورنمنٹ ڈگری کالج، ڈوڈہ کو فوری طور پر معطل کیا جاتا ہے اور وہ اگلے احکامات تک ڈائریکٹر کالجز، جموں و کشمیر کے دفتر کے ساتھ منسلک رہیں گے۔‘‘