سوپور میں دو منشیات فروش گرفتار، ممنوعہ مواد ضبط:پولیس

سرینگر: منشیات اسمگلنگ کے خلاف مہم جاری رکھتے ہوئے سوپور پولیس نے دو منشیات فروشوں کو گرفتار کرکے ان کی تحویل سے ممنوعہ مواد ضبط کیا ہے ۔
ایک پولیس ترجمان نے اپنے ایک بیان میں کہا کہ سوپور پولیس نے میونسپل عمارت سوپور کے قریب ناکہ چیکنگ کے دوران اقبال مارکیٹ سے مین چوک سوپور کی طرف آ رہے بیٹری آٹو کو روکا۔
ترجمان نے کہا کہ تلاشی کے دوران آٹو ڈرائیور اور اس میں سوار دوسرے شخص کے قبضے سے پوست بھوسہ جیسا ممنوعہ مواد بر آمد کیا گیا جس کے بعد دونوں کو موقع ہی گرفتار کرلیا گیا۔
ملزموں کی شناخت سبزار احمد شیخ ولد غلام نبی شیخ ساکن کاٹھی دروازہ رعناواری حال ڈوگلی ٹینگ سوپور (ڈرائیور) اور منظور احمد صوفی عرف من دوب ولد بشیر احمد صوفی ساکن نہر پورہ سوپور کے طور پر کی گئی ہے ۔
پولیس ترجمان نے بتایا کہ اس سلسلے میں پولیس اسٹیشن سوپور میں این ڈی پی ایس ایکٹ کے متعلقہ دفعات کے تحت ایک ایف آئی آرایک مقدمہ درج کیا گیا اور مزید تحقیقات شروع کی گئی۔
انہوں نے کہا کہ سوپور پولیس منشیات کے خلاف سخت کارروائیاں انجام دینے کے لئے پر عزم ہے ۔