کشمیر میں انڈوں کے نمونے معیار کے امتحان میں کامیاب، فوڈ سیفٹی محکمہ

سرینگر: اسسٹنٹ کمشنر فوڈ سیفٹی کشمیر ہلال احمد میر نے جمعہ کے روز کہا کہ کشمیر ڈویژن کے مختلف علاقوں سے لیے گئے انڈوں کے تمام نمونے محفوظ اور معیاری قرار دیے گئے ہیں۔
ایک مقامی خبر رساں ایجنسی سے بات کرتے ہوئے ہلال احمد میر نے بتایا کہ۲۰نومبر کو معمول کی جانچ مہم کے تحت کشمیر ڈویژن کے مختلف اضلاع سے مجموعی طور پر۲۹؍انڈوں کے نمونے حاصل کیے گئے تھے۔
انہوں نے کہا کہ ان نمونوں کو معیار، حفاظت اور فوڈ سیفٹی معیارات پر پورا اترنے کی جانچ کے لیے لیبارٹری بھیجا گیا تھا۔
میر کے مطابق’’لیبارٹری رپورٹس سے تصدیق ہوئی ہے کہ تمام نمونے مقررہ معیارات پر پورا اترتے ہیں۔ کسی بھی نمونے میں ملاوٹ، آلودگی یا غیر معیاری کیفیت نہیں پائی گئی‘‘۔
انہوں نے کہا کہ یہ سیمپلنگ مقامی منڈیوں میں فروخت ہونے والے انڈوں کے معیار سے متعلق اٹھنے والے خدشات کے پیش نظر کی گئی تھی۔ عوامی صحت کے تحفظ اور صارفین کے درمیان پائی جانے والی تشویش کو دور کرنے کے لیے فوڈ سیفٹی محکمہ نے یہ مہم شروع کی۔
اسسٹنٹ کمشنر نے مزید کہا کہ محکمہ فوڈ سیفٹی کشمیر ڈویژن میں مختلف غذائی اشیاء کی باقاعدہ جانچ اور سیمپلنگ کرتا رہتا ہے تاکہ فوڈ سیفٹی قوانین پر عمل درآمد یقینی بنایا جا سکے۔
ان کا مزید کہنا تھا’’ایسی مہمات کا مقصد شفافیت برقرار رکھنا، صارفین کا اعتماد بحال کرنا اور جہاں کہیں بھی خلاف ورزیاں پائی جائیں، وہاں سخت کارروائی کرنا ہے‘‘۔
میر نے واضح کیا کہ محکمہ آئندہ بھی نگرانی اور نفاذی اقدامات جاری رکھے گا تاکہ صارفین تک صرف محفوظ اور معیاری غذائی اشیاء ہی پہنچیں۔